Salmus 34 - BIBLIA - traduson antigu in Krioulo

Salmu di Davi oca ki finji dudu dianti di Akis, ku serkal na si tera (1 Sam 21.13-15).

¹ N na papia ben di SIÑOR tudu tempu; ña boka na ngabal sempri.

² Ku ña korson N na njata na SIÑOR; mansus na obil, e na kontenti.

³ Bo garandisi SIÑOR ku mi; bo bin no junta, no papia ben di si nomi.

⁴ N buska SIÑOR; el i kudin, i libran di tudu ña medu.

⁵ Kilis ku jubi pa el e ta numiadu, se rostu ka na sufri mas borgoña.

⁶ Ami, koitadi, N coma SIÑOR; i obin, i salban di tudu ña kanseras.

⁷ Anju di SIÑOR ta sta sempri na roda di kilis ku rispita Deus, i ta libra elis.

⁸ Bo spurmenta pa bo jubi kuma ku SIÑOR i bon; omi ku fiansa nel i ta sedu sortiadu.

⁹ Bo rispita SIÑOR, abos ku sedu si pobu, pabia nada ka ta falta kilis ku rispital.

¹⁰ Fijus di lion pudi sinti falta, e pasa fomi, ma kilis ku buska SIÑOR, nada ka na falta elis.

¹¹ Ña fijus, bo bin, bo sukutan; N na nsina bos manera di rispita SIÑOR.

¹² Kin di bos ku gosta di vida, i misti vida kumpridu ku sabura?

¹³ Guarda bu lingua di mal; libra bu boka di nganu.

¹⁴ Lunjusi di mal, bu fasi kil ki bon; buska pas, bu yanda nel.

¹⁵ Uju di SIÑOR sta riba di justus; si oreja sta atentu pa obi si e coma.

¹⁶ Rostu di SIÑOR sta kontra kilis ku ta fasi mal, pa pui pa mundu ka lembra delis mas.

¹⁷ Justus ta coma; SIÑOR ta obi elis, i libra elis di tudu se kasabi.

¹⁸ SIÑOR sta pertu di kilis ku tene korson kebrantadu; i ta salba kilis ku tene spiritu kalkadu.

¹⁹ Omi justu pudi tene manga di fadiga, ma SIÑOR ta libral del tudu;

²⁰ i ta guarda si os tudu, pa nin un son ka kebradu.

²¹ Maldadi na mata omi mau; kilis ku sta kontra justu e na kastigadu.

²² SIÑOR ta kaplinti si servus; nin un di kilis ku fiansa nel ka na kondenadu.