Salmus 33 - BIBLIA - traduson antigu in Krioulo

¹ Abos justus, bo kanta ku kontentamentu pa SIÑOR, pabia i bon pa jinti retu ngabal.

² Bo ngaba SIÑOR ku arpa, bo kanta pa el ku salteriu di des korda.

³ Bo kanta un nobu kantiga pa el; bo toka ku jitu, ku kontentamentu.

⁴ Palabra di SIÑOR i retu; na tudu ki ta fasi, i fiel.

⁵ SIÑOR ama bardadi ku justisa; tera inci di si bondadi.

⁶ SIÑOR kumpu seu ku si palabra, ku si folgu i kumpu tudu strelas ku lua ku sol.

⁷ I ta junta yagu di mar na un monton; i ta guarda fundura di yagu na armazens.

⁸ Jinti di tudu tera pa e rispita SIÑOR; tudu moraduris di mundu pa e ten medu del.

⁹ El i papia; tudu bin kumpudu; i da ordi; tudu kusa bin sedu.

¹⁰ SIÑOR ta dana planus di nasons, i ta maina kusas ku jinti pensa fasi.

¹¹ Ma planus di SIÑOR ta firma pa sempri; kusas ki pensa fasi i pa tudu tempu.

¹² Sortiadu i ki nason ku tene SIÑOR suma si Deus; sortiadu i ki pobu ki kuji pa si yardansa.

¹³ SIÑOR, la na seu, ta jubi, i ta oja tudu jinti.

¹⁴ Na si morada i ta jubi pa tudu moraduris di mundu.

¹⁵ I el ku ta forma korson delis tudu, i ta jubi tudu kusa ke fasi.

¹⁶ I ka ten rei ku ta ngaña son pabia i tene manga di tropa, nin i ka ten soldadu ku ta libra pabia i ten garandi forsa.

¹⁷ Kabalu i ka di fiansa nel pa ngaña vitoria; nin ku tudu si garandi forsa, i ka ta libra ningin.

¹⁸ Ma uju di SIÑOR sta riba di kilis ku rispital, kilis ku pui se speransa na si bondadi

¹⁹ pa libra elis di mortu, pa guarda elis ku vida na tempu di fomi.

²⁰ No pui no speransa na SIÑOR; el i no ajuda, i no tajadera.

²¹ No korson ta kontenti nel, pabia no fiansa na si nomi sagradu.

²² SIÑOR, bu bondadi pa i sta riba di nos, suma ku no pui no speransa na bo.