Salmus 30 - BIBLIA - traduson antigu in Krioulo

Salmu di Davi. Kantiga pa dedikason di palasiu.

¹ O SIÑOR, N na garandisiu, pabia abo bu garandisin; bu ka disa ña inimigus ŋuminin.

² O SIÑOR ña Deus, N comau; abo bu kuran.

³ O SIÑOR, bu torna tisin di koba di mundu di mortu; bu guarda ña vida pa N ka ria na koba.

⁴ Bo kanta pa SIÑOR, abos ku sedu si pobu; bo lembra kuma ki sedu santu, bo ngabal,

⁵ pabia si raiba ta tarda un bokadiñu son, ma si fabur i pa tudu vida. Jinti pudi cora tok sol mansi, ma kontentamentu ta bin parmaña.

⁶ Oca ku kusas na kurin diritu, N fala: “Nunka N ka na batidu.”

⁷ Abo, SIÑOR, oca ku bu mostran fabur, bu fasin forti suma montaña. Ma oca ku bu kubri bu rostu, N fika tarpajadu.

⁸ N comau, SIÑOR, N rogau pa bu judan, N punta:

⁹ “Si N ria na koba, kal purbitu ku ña mortu pudi ten? Nta reia pudi ngabau, o i pudi konta manera ku bu sedu bardadi?

¹⁰ SIÑOR, obin, bu ten pena di mi, bu sedu ña ajuda.”

¹¹ Bu bidanta ña tristesa baju di kontentamentu; bu tira saku di cur ku N bistiba, bu bistin ku ropa di alegria,

¹² pa ña korson pudi kanta pa ngabau, pa i ka kala. SIÑOR ña Deus, sempri N na falau obrigadu.