Salmus 29 - BIBLIA - traduson antigu in Krioulo

Salmu di Davi.

¹ Abos ku ten puder, bo seta kuma SIÑOR ten gloria ku forsa.

² Bo da SIÑOR ki gloria ku si nomi mersi; bo adora SIÑOR na bonitasku di si puresa.

³ Fála di SIÑOR ta obidu riba di mar; Deus gloriosu ta papia suma turbada; SIÑOR ta papia riba di mar garandi.

⁴ Fála di SIÑOR i puderosu; fála di SIÑOR i mas forti di ki di rei.

⁵ Fála di SIÑOR ta kebra sedrus; SIÑOR ta kebra ki sedrus di Líbanu,

⁶ i ta pui montis di Líbanu pa e salta suma bakasiñu; i ta pui monti Ermon jukuta suma fiju di baka brabu.

⁷ Fála di SIÑOR ta pui relampagu pa i da faiska.

⁸ Fála di SIÑOR ta bulbuli lala; SIÑOR ta bulbuli lala di Kades.

⁹ Fála di SIÑOR ta pui gazela pa i padi, i ta tira fojas di arvuris di matu. Na si kasa kada kin ta fala: “Gloria pa Deus!”

¹⁰ SIÑOR ta rena riba di diluviu; SIÑOR ta sinta suma Rei pa sempri.

¹¹ SIÑOR na da forsa pa si pobu; i na bensua elis ku pas.