Salmus 27 - BIBLIA - traduson antigu in Krioulo

Salmu di Davi.

¹ SIÑOR i ña lus, i ña salbason; kin ku N na medi? SIÑOR i suguransa pa ña vida; kin ku N dibi di medi?

² Ora ku malvadus ku sta kontra mi, ku sedu ña inimigus, bin pa atakan, pa ngulin, e ta da tapada, e kai.

³ Nin si manga di tropa tajan, ña korson ka na medi; nin si gera lanta kontra mi, mesmu asin N na ten fiansa.

⁴ Un kusa ku N pidi SIÑOR, ku N na buska: pa N pudi mora na kasa di SIÑOR tudu dias di ña vida, pa N pudi jubi-jubi bonitasku di SIÑOR, N buskal na si kasa.

⁵ Na dia di foronta i ta guardan suguru, sukundidu bas di kurtina di tenda di si morada, i na pun riba di un roca.

⁶ Asin, ña kabesa na yalsadu riba di ña inimigus ku na tajan; na si kau sagradu N na pursenta sakrifisius ku gritus di kontentamentu; N na kanta salmus pa ngaba SIÑOR.

⁷ SIÑOR, obi ña fála ora ku N comau; sinti pena di mi, bu kudin.

⁸ Oca ku bu fala: “Bo buska ña rostu,” ña korson falau: “SIÑOR, N na buskau.”

⁹ Ka bu sukundi bu rostu di mi, nin ka bu ribantan ku raiba. Bu seduba ña ajuda; ka bu negan, nin ka bu bandonan, o Deus, ña Salbadur.

¹⁰ Nin si ña pape ku ña mame bandonan, SIÑOR na kujin.

¹¹ Nsinan bu manera di yanda, SIÑOR; gian na un kamiñu diritu pabia di kilis ku na jimpini.

¹² Ka bu ntregan na vontadi di ña inimigus, pabia tustumuñas falsu lanta kontra mi ku ta da folgu ku ameasa.

¹³ N fia kuma N na oja bondadi di SIÑOR na tera di jinti bibu.

¹⁴ Pera na SIÑOR, bu ten koraẑen, bu fortifika bu korson. Pera na SIÑOR.