Salmus 25 - BIBLIA - traduson antigu in Krioulo

Salmu di Davi.

¹ SIÑOR, N yalsa ña korson pa bo.

² Ña Deus, N fiansa na bo; ka bu disan pasa borgoña, nin pa ña inimigus ŋumnin.

³ Na bardadi, kilis ku ten speransa na bo e ka na bin pasa borgoña, ma kilis ku sedu falsu sin roson e na ten borgoña.

⁴ Nsinan bu kamiñus, SIÑOR; fasin pa N kunsi elis.

⁵ Gian na bu bardadi, bu nsinan, pabia abo i Deus ña Salbadur, ku N na pera tudu dia.

⁶ SIÑOR, lembra di bu amor ku bondadi ku sedu antis di mundu kumpudu.

⁷ Ka bu lembra di pekadus ku N fasi ocan nobu, manera ku N kebra bu lei, ma lembra di mi, SIÑOR, konformi bu amor ku bondadi.

⁸ SIÑOR i bon, i justu; pabia di kila, i ta nsina pekaduris si kamiñu.

⁹ I ta gia jinti mansu na kamiñu diritu, i ta nsina elis manera di yanda.

¹⁰ SIÑOR ta mostra sempri amor ku bardadi pa kilis ku guarda si kontratu, e obdisi si ordis.

¹¹ Pabia di bu nomi, SIÑOR, purda ña pekadu, nin si i garandi.

¹² Si i ten un omi ku ta rispita SIÑOR, SIÑOR na nsinal kamiñu ki dibi di kuji.

¹³ I na diskansa na sabura; si jorson na yarda tera di Israel.

¹⁴ SIÑOR ta konta si sigridu pa kilis ku rispital, i ta pui elis kunsi si kontratu.

¹⁵ Ña uju sta sempri na SIÑOR; el ku ta tira ña pe na ridia.

¹⁶ Jubi pa mi, bu mostran fabur, pabia N sta ami son, fadigadu.

¹⁷ Kansera di ña korson i buri; libran di ña foronta.

¹⁸ Jubi pa ña fadiga ku sufrimentu, bu purda tudu ña pekadus.

¹⁹ Jubi kuma ku ña inimigus ciu; e odian ku forsa.

²⁰ Guarda ña vida, bu libran; ka bu disan pa N bin burguñu, pabia N fiansa na bo.

²¹ Bardadi ku retidon pa e guardan, pabia N fiansa na bo.

²² O Deus, liberta Israel na tudu si forontas.