Salmus 23 - BIBLIA - traduson antigu in Krioulo

Salmu di Davi.

¹ SIÑOR i ña bakiadur; nada ka na faltan.

² I ta pun pa N dita na paja verdi; i ta gian pa yagu susegadu.

³ I ta arnoba vida dentru di mi, i ta gian pa kamiñu sertu pa amor di si nomi.

⁴ Nin si N yanda na kobon di sombra di mortu, N ka na sinti medu di mal, pabia bu sta ku mi; bu manduku ku bu po di sakur ta dan koraẑen.

⁵ Bu ta purpara un festa ña dianti nunde ku ña inimigus pudi ojan. Bu ta unta ña kabesa ku azeiti; bu ta inci ña kopu tok i darma.

⁶ N sibi kuma bu bondadi ku amor na kumpañan tudu dias di ña vida; N na mora na kasa di SIÑOR pa tudu ña vida.