Salmus 22 - BIBLIA - traduson antigu in Krioulo

Salmu di Davi pa ŝef di musika, pa sedu kantadu ku musika di “Gazela di parmaña”.

¹ Ña Deus, ña Deus, pabia di ke ku bu bandonan? Ke ku manda bu sta lunju di palabras ku N na grita pa bo, bu ka na salban?

² Ña Deus, N ta comau di dia, bu ka kudin; N ta comau di noti, N ka ten susegu.

³ Abo i ki Deus Santu ku Israel ta ngaba; bu sta sintadu na tronu.

⁴ No papes fiansa na bo; e fia, bu libra elis.

⁵ E comau, e kapli; e fiansa na bo, e ka fika na borgoña.

⁶ Ami N ka sedu ja omi, N sedu mañoka; jinti ta koban, e njutin!

⁷ Tudu jinti ku ojan e ta fasin trosa, e tira se lingua, e balansa kabesa, e fala:

⁸ “I fiansa na SIÑOR; pa SIÑOR salbal; pa i libral, suma ki gosta del!”

⁹ Abo ku tiran na bariga di ña mame, bu guardan oca ku N na mamaba inda.

¹⁰ N ntregadu na bo disna ku N padidu; desdi bariga di ña mame bu sedu ña Deus.

¹¹ Ka bu lunjusi di mi, pabia foronta sta pertu; i ka ten ningin ku na judan.

¹² Manga di jinti na tajan suma turus; e rodian suma ki turus forti di Basan.

¹³ E yabri boka kontra mi, suma lion ku na pupa, i sapa-sapa kil ki paña.

¹⁴ Ña forsa na darmadu suma yagu; ña os tudu disloka. Ña korson torna suma sera ku ribi dentru di mi.

¹⁵ Ña forsa seku kan! Ña lingua pega na jinjirba; bu ditandan na reia di mortu.

¹⁶ Manga di omi mau junta, e rodian suma kacuris, e furan mon ku pe.

¹⁷ N pudi fasi konta di tudu ña os; elis e na oja pa mi, e ŋuminin.

¹⁸ E rapati ña ropa entri elis; e juga sorti riba di ña kamisoti.

¹⁹ Ma abo, SIÑOR, ka bu lunjusi di mi; abo ku sedu ña forsa, janti pa sakuran.

²⁰ Libran di spada; ña vida ku ten balur, salbal di forsa di ki kacuris.

²¹ Salban di boka di lions; ku cifris di turus brabu.

²² N na papia di bu nomi pa ña ermons; N na ngabau na metadi di juntamentu.

²³ Abos ku ta rispita SIÑOR, bo ngabal! Abos tudu di jorson di Jakó, bo dal onra! Abos tudu di jorson di Israel, bo rispital!

²⁴ I ka dispreza, nin i ka disdangu sufrimentu di kil ku foronta, nin i ka sukundi si rostu del. Oca ku kila comal pa i sakural, i obil.

²⁵ I abo ku ta pui garandi juntamentu pa e ngaban; N na kumpri purmesas dianti di kilis ku rispitau.

²⁶ Koitadis na kume, e farta; kilis ku buska SIÑOR na ngabal. N dija pa e ten koraẑen pa sempri!

²⁷ Jinti di tudu parti di mundu na lembra, e na konverti pa SIÑOR. Tudu familias di nasons e na mpina si dianti, pa adoral,

²⁸ pabia renu i di SIÑOR; i el ku na guberna nasons.

²⁹ Tudu garandis di mundu na bin kume, e adoral; tudu kilis ku na ria pa koba na mpina si dianti, suma tambi kilis ku ka pudi guarda se propi vida.

³⁰ Jorsons di futuru na sirbil, e na kontadu aserka di SIÑOR.

³¹ E na anunsia pa jinti ku na bin padidu kuma Deus i justu; i el ku fasi e kusas.