Salmus 21 - BIBLIA - traduson antigu in Krioulo

Salmu di Davi pa ŝef di musika.

¹ O SIÑOR, rei ta kontenti ku bu forsa, i ta ten garandi kontentamentu ku vitoria ku bu ta da.

² Bu dal ke ku si korson misti; bu ka negal kusas ki pidi ku si boka. Sela

³ Bu dal bensons di rikesa, bu pui koroa di uru finu na si kabesa.

⁴ I pidi vida; bu dal el, te bu dal vida kumpridu ku na tarda pa sempri.

⁵ Si gloria i garandi pabia di vitoria ku bu dal; bu dal rispitu ku puder di rei.

⁶ Bu dal benson ku ka na kaba; bu rostu ta incil ku kontentamentu.

⁷ Rei fiansa na SIÑOR; i na fika suguru pabia di amor di kil ku sta riba di tudu.

⁸ Bu mon na yangasa tudu bu inimigus; bu mon direita na paña kilis ku ka gosta di bo.

⁹ Ora ku bu parsi, bu na bidanta elis suma furnu di fugu. SIÑOR, na si raiba, i na nguli elis; fugu na kaba ku elis.

¹⁰ Bu na kaba ku se jorson na tera, pa e pirdi na metadi di jinti.

¹¹ E pensa fasi mal kontra bo, e ranja planus di tarpasa, ma e ka na ngaña.

¹² Bu na pui elis vira kosta, pabia bu ponta elis ku fleŝa.

¹³ SIÑOR, toma bu lugar altu, na bu forsa; asin no na kanta pa ngaba bu puder.