Salmus 19 - BIBLIA - traduson antigu in Krioulo

Salmu di Davi pa ŝef di musika.

¹ Seu ta konta gloria di Deus, i ta mostra tarbaju di si mon.

² Un dia ta konta utru dia; un noti ta mostra kuñisimentu pa utru noti,

³ sin lingua, sin palabra; si fála ka ta obidu,

⁴ ma si rekadu ta obidu na tudu tera, si palabra ta ciga te na kabantada di mundu. La na seu, Deus pui tenda pa sol,

⁵ ku ta sai di parmaña suma noivu, tudu kontenti, suma kampion ku sta pruntu pa bai si kurida.

⁶ I ta kumsa na un ladu di seu, i ta da si kurva te na utru ladu; nada ka pudi sukundi di si kalur.

⁷ Lei di SIÑOR i pirfitu, i ta pui nobu vida na algin; nsinamentus di SIÑOR i di fiansa, i ta da jiresa pa kilis ku ka tenel.

⁸ Ordis di SIÑOR i retu, i ta kontenta korson; mandamentu di SIÑOR i puru, i ta da ntindimentu klaru.

⁹ Rispitu pa SIÑOR i limpu, i ta manti pa sempri. Julgamentus di SIÑOR i retu; tudu elis i justu.

¹⁰ E mas ten balur di ki uru, mas di ki manga di uru puru. E mas ta mela di ki mel ora ki sai na si bagus.

¹¹ E ta da avisu pa mi, bu servu; kil ku ta obdisi elis i ten garandi purbitu.

¹² Kin ku pudi oja si propi erus? SIÑOR, purdan kilis ku N ka nota.

¹³ Libra bu servu di pekadus ku N ta ntema pa fasi, pa ka e manda riba di mi. Asin N ta sedu sin kulpa, N fika limpu di garandi pekadu.

¹⁴ O SIÑOR, ña Roca, ña Libertadur, palabras di ña boka ku pensamentus di ña korson pa e sabi na bu dianti.