Salmus 18 - BIBLIA - traduson antigu in Krioulo

¹ N amau ciu, SIÑOR, ña forsa.

² SIÑOR i ña roca, ña lugar forti, ña Libertadur, ña Deus, ña kau suguru ku N fiansa nel; el i ña tajadera, forsa di ña salbason, ña kau altu di sukundi.

³ N na coma nomi di SIÑOR ku mersi ngabadu; asin N ta fika libri di ña inimigus.

⁴ Kordas di mortu maran kansadu; maron danadur bin pañan.

⁵ Kordas di mundu di mortu pertan; armadilias di mortu pudu pa pañan.

⁶ Na foronta N coma SIÑOR, N yalsa fála pa ña Deus. El, na si kasa sagradu, i obi ña vos; ña gritu ciga na si oreja.

⁷ Asin, con bulbuli, i tirmi; alisersus di montis balansa, e tirmi, pabia Deus staba ku raiba.

⁸ Fumu sai na si naris; fugu ku ta kaba ku kusas sai na si boka; brasas di fugu sai nel.

⁹ I yabri seu, i ria; i teneba nuven sukuru bas di si pe.

¹⁰ I monta na un kirubin, i bua; sin, i bua na asas di bentu.

¹¹ I fasi sukuru pa i sedu si kau di sukundi; kurtina ku kubril i sedu nuvens sukuru, kargadu ku cuba.

¹² Na gloria ku staba si dianti i sai nuvens sukuru ku pajiga, ku cuba di pedra ku raius di relampagu.

¹³ Di seu SIÑOR papia risu suma turbada; Deus ku sta riba di tudu yalsa si fála; logu i ten cuba di pedra ku raius di relampagu.

¹⁴ I buri si raius, ku sedu suma fleŝas, i pajiga inimigus, i serka elis.

¹⁵ SIÑOR, oca ku bu raprindi inimigus, oca tambi ki folgu forti rebenta na bu naris, kau fundu di mar ojadu, alisersus di mundu diskubridu.

¹⁶ Deus, na si kau altu, i distindi si mon, i pegan, i tiran na yagu fundu.

¹⁷ I libran di ña inimigu forti, di kilis ku ka gosta di mi, ku sedu mas forti di ki mi.

¹⁸ E atakan na dia di ña foronta, ma SIÑOR sedu ña forsa.

¹⁹ I tisin na un kau largu, i libran, pabia i kontenti ku mi.

²⁰ SIÑOR tratan diritu suma ña vida i justu; i pagan konformi puresa di ña mon,

²¹ pabia N yanda na kamiñus di SIÑOR, nin N ka disvia di ña Deus pa fasi mal.

²² Tudu si leis sta ña dianti; N ka vira kosta pa si regras.

²³ N fika sin kulpa si dianti; N libra di fasi pekadu.

²⁴ Asin SIÑOR tratan diritu suma ña vida i justu, konformi i oja puresa di ña mon.

²⁵ Abo, SIÑOR, ku jinti fiel, bu ta mostra kuma abo i fiel; pa jinti di bardadi, bu ta mostra kuma abo i bardadi;

²⁶ pa jinti puru, bu ta mostra kuma abo i puru; pa jinti tortu, bu ta mostra kuma abo i risu.

²⁷ Bu ta salba jinti umildi, ma bu ta bati jinti orgulyosu.

²⁸ Abo bu ta sindi ña kanderu; SIÑOR ña Deus na bidanta ña sukuru klaridadi.

²⁹ Ku bu ajuda, N fura na metadi di tropas; ku ña Deus N pudi salta riba di mura.

³⁰ Kamiñu di Deus i pirfitu; palabra di SIÑOR i sertu. SIÑOR i tajadera pa tudu kilis ku fiansa nel.

³¹ Kin ki Deus si i ka SIÑOR? Kin ku sedu Roca si i ka no Deus?

³² Deus i kil ku ta dan forsa, i ta fasi ña kamiñu pirfitu.

³³ I ta fasi ña pe suma di gazela; i ta firmantan na kau altu.

³⁴ I ta trena ña mon pa gera, di manera ki ten forsa pa usa mansasa di kobri.

³⁵ Bu ta difindin, bu ta salban; bu mon direita ta nguentan; bu mansesa ta garandisin.

³⁶ Bu limpan kamiñu pa i mas largu, pa N pudi yanda sin tursi pe.

³⁷ N serka ña inimigus tok N paña elis; N ka riba tok N kaba ku elis.

³⁸ N masa-masa elis tok e ka pudi lanta mas; e kai bas di ña pe.

³⁹ Bu dan forsa pa gera; kilis ku lanta kontra mi, bu baŝa elis ña dianti.

⁴⁰ Bu pui ña inimigus pa e kuri di mi; pa N pudi kaba ku kilis ku sta kontra mi.

⁴¹ E pupa, ma i ka ten kin ku libra elis; e coma SIÑOR, ma el i ka kudi elis.

⁴² N pila elis suma puera ku bentu ta leba; N bota elis fora suma lama na rua.

⁴³ Bu libran oca pobu lanta kontra mi; bu fasin kabesa di nasons; jinti ku N ka kunsi e sta bas di mi.

⁴⁴ Logu ke obin, e ta obdisin; stranjerus na fika bas di mi.

⁴⁵ Elis e pirdi koraẑen, e sai na se kaus forti ku medu.

⁴⁶ SIÑOR sta bibu! Ña Roca dibi di ngabadu! Deus ña Salbadur pa i garandisidu!

⁴⁷ I Deus ku ta toma vingansa pa mi, ku baŝa nasons ña dianti,

⁴⁸ ku ta libran di ña inimigus. Sin, bu yalsan riba di kilis ku lanta kontra mi; bu libran di omis violentu.

⁴⁹ Asin N na ngabau na metadi di nasons, o SIÑOR; N na kanta pa ngaba bu nomi.

⁵⁰ I el ku ta da garandi vitorias pa si rei; i ta mostra bondadi pa rei ki kuji, ku sedu Davi ku si jorson pa sempri.