Salmus 144 - BIBLIA - traduson antigu in Krioulo

Salmu di Davi.

¹ SIÑOR ku sedu ña Roca, pa i ngabadu, kil ku ta nsina ña mon ku dedus pa gera.

² El i ña bondadi, ña forsa, ña kau altu di sukundi, ña libertadur, ña tajadera ku N fiansa nel, ku ta pui nasons bas di mi.

³ SIÑOR, kin ki omi pa bu toma kuñisimentu del? O kin ki fiju di omi pa bu pui sintidu nel?

⁴ Omi i suma bentu; si dias i suma sombra ku ta pasa.

⁵ O SIÑOR, yabri bu seu, bu ria; toka na montañas pa e fuma.

⁶ Manda bu raius, bu pajiga inimigus; manda bu fleŝas, bu serka elis.

⁷ Distindi bu mon di la riba, bu libran, bu rabatan di manga di yagu, ku mon di jinti di utru teras,

⁸ ku se boka ta papia mintida, se mon direita ta yalsadu na palabras falsu.

⁹ O Deus, N na kanta un kantiga nobu pa bo; N na toka salteriu di des korda, N kanta pa ngabau.

¹⁰ Abo ku ta da reis vitoria, ku ta libra Davi, bu servu, di spada ku ta mata.

¹¹ Libran, bu kaplintin di mon di jinti di utru teras, ku se boka ta papia mintida, se mon direita ta yalsadu na palabras falsu.

¹² Asin no fijus, na se juventudi, e na sedu suma plantas ku na kirsi diritu; no fijus femia na sedu suma pedras di skina labradu, suma kulunas di un palasiu.

¹³ No bembas na inci ku tudu koldadi kumida; no karnel na padi manga di milyaris di fiju na no kampadas.

¹⁴ No turus na sedu forti pa tarbaju; bariga di bakas ka na dana. I ka na ten gritus di miskiñu na no ruas.

¹⁵ Sortiadu i ki pobu ku sta asin; sortiadu i ki pobu ku SIÑOR i se Deus.