Salmus 143 - BIBLIA - traduson antigu in Krioulo

Salmu di Davi.

¹ O SIÑOR, obi ña orason, bu para oreja pa ña pididu. Kudin, suma ku bu sedu justu i fiel.

² Ka bu leba bu servu pa julgamentu, pabia na bu uju i ka ten kin ki justu na metadi di bibus.

³ Inimigu pirsigin, i batin na con; i fasin mora na sukuru suma kilis ku muri disna.

⁴ Asin ña spiritu na dismaja dentru di mi, ña korson sta tarpajadu.

⁵ N ta lembra di dias ku pasa, N ta pensa na bu tarbaju, tudu kusas ku bu mon fasi.

⁶ N ta distindi ña mon pa bo, ña alma ta faima pa bo suma ku tera seku ta misti cuba. Sela

⁷ O SIÑOR, kudin kinti-kinti; ña spiritu na dismaja. Ka bu sukundin bu rostu, pa N ka bin torna suma kilis ku na ria na koba.

⁸ Fasin pa N obi bu palabra di bondadi parmaña, pabia N fiansa na bo. Mostran kamiñu ku N dibi di yanda, pabia N na jubi pa bo.

⁹ O SIÑOR, libran di ña inimigus, pabia N na buska suguransa na bo.

¹⁰ Nsinan fasi bu vontadi, pabia abo i ña Deus. Pui bu bon Spiritu pa i gian na con filadu.

¹¹ O SIÑOR, arnoba ña vida pa amor di bu nomi; pabia di bu retidon, tiran na sufrimentu.

¹² Na bu bondadi, mata ña inimigus; kaba ku tudu kilis ku na kansan, pabia ami i bu servu.