Salmus 142 - BIBLIA - traduson antigu in Krioulo

Maskil di Davi. Un orason oca ki staba na kaverna (1 Sam 22.1)

¹ N yalsa ña vos, N coma SIÑOR, N fasi ña rogu pa SIÑOR ku vos altu.

² N pui ña keŝa si dianti, N kontal tudu ña kasabi.

³ Oca ku ña spiritu na dismaja dentru di mi, i abo ku kunsi kau ku N staba. Na kamiñu ku N na yandaba, e sukundi armadilia.

⁴ N jubi na ña direita, N oja kuma i ka ten kin ku kunsin, nin kau di suguransa; ningin ka bin toma konta di mi.

⁵ Abo ku N coma, SIÑOR; N fala: “Abo i ña kau suguru; abo i ña kiñon na tera di jinti bibu.”

⁶ Kudin si N comau, pabia N sta disisperadu; libran di ña pirsigiduris, pabia e sedu mas forti di ki mi.

⁷ Tiran na kalabus, pa N pudi ngaba bu nomi. Asin, justus na bin rodian, pabia di bu bondadi pa mi.