Salmus 141 - BIBLIA - traduson antigu in Krioulo

Salmu di Davi.

¹ O SIÑOR, N na comau; bin kudin; para bu oreja pa ña vos ora ku N comau.

² Disa ña orason subi bu dianti suma nsensu; ora ku N yalsa mon, pa i sedu suma sakrifisiu di tardiñu.

³ SIÑOR, pui guarda na ña lingua; bisia na porta di ña boka.

⁴ Ka bu disa ña korson jingi pa mal, pa N fasi kusas tortu ku jinti ku ta fasi mal. Judan pa N ka kume se kusas sabi.

⁵ Si algin justu sutan, i ta sedu bondadi; si i raprindin, i ta sedu suma azeiti riba di ña kabesa ku N ka na nega. N na kontinua ora kontra maldadis di jinti mau.

⁶ Ora ku se ŝefis botadu riba di pedra garandi pa bas, e na ntindi kuma ña palabras seduba bardadi.

⁷ Suma algin ta labra, i pajiga con, asin ku se os pajigadu na boka di koba di mortu.

⁸ Ma ña uju sta na bo, o SIÑOR Deus; N fiansa na bo; ka bu ntregan pa mortu.

⁹ Guardan di armadilias ku jinti ku ta fasi mal yarma pa pañan ku el.

¹⁰ Pui jinti mau pa e kai na se propi ridias, nkuantu ami N kapli, N pasa.