Salmus 140 - BIBLIA - traduson antigu in Krioulo

Salmu di Davi pa ŝef di musika.

¹ O SIÑOR, libran di jinti mau; guardan di omis violentu

² ku ta fasi planus mau, e ta cuci jus tudu ora.

³ E ta mola se lingua suma serpenti; se boka tene venenu suma kobra tutu. Sela

⁴ O SIÑOR, guardan di mon di jinti mau, bu libran di omis violentu ku misti pun pa N kai.

⁵ Orgulyosus ta sukundi armadilias ku kordas kontra mi; e ta distindi ridia lungu di kamiñus, e yarma armadilia pa pañan. Sela

⁶ N fala SIÑOR: “Abo i ña Deus.” Obin ora ku N pidiu sakur, SIÑOR.

⁷ O SIÑOR Deus, forsa di ña salbason, bu kubrin kabesa na dia di gera.

⁸ O SIÑOR, ka bu da jinti mau ke ke misti; ka bu disa se planus mau pa e bai dianti, pa e ka njata. Sela

⁹ Kilis ku sta na ña roda ku lanta kontra mi, pui pa maldadi di se palabras kai riba di se propi kabesa.

¹⁰ Pui brasas di fugu pa i kai riba delis, pa e botadu na fugu, na kobas fundu, nunde ke ka pudi torna sai.

¹¹ Omi di lingua mau ka na tene kau sertu pa sinta na tera; mal na pirsigi omi violentu tok i tiradu na con.

¹² N sibi kuma SIÑOR na difindi kasu di kil ku kalkadu, tambi i na difindi diritu di koitadi.

¹³ Asin jinti justu na ngaba bu nomi, retus na mora na bu pursensa.