Salmus 119 - BIBLIA - traduson antigu in Krioulo

Alef

¹ Sortiadu i kilis ku tene vida retu, ku ta yanda konformi lei di SIÑOR.

² Sortiadu i kilis ku obdisi si nsinamentus, e buskal ku tudu se korson.

³ E ka ta yara, ma e ta yanda na si kamiñus.

⁴ Bu danu bu mandamentus, pa no pudi sigil ku mpeñu.

⁵ N misti yanda na kamiñu diritu pa N pudi obdisi bu regras.

⁶ Si N para sintidu na bu mandamentus, N ka na pasa borgoña.

⁷ N na ngabau ku korson retu ora ku N bin sibi bu leis justu.

⁸ N na sigi bu regras; nunka ka bu bandonan.

Bet

⁹ Kuma ku un joven pudi guarda si vida puru? I son ora ki na vivi konformi bu palabra.

¹⁰ N buskau ku tudu ña korson; ka bu disan disvia di bu mandamentus.

¹¹ N rakada bu palabra na ña korson pa N ka peka kontra bo.

¹² Bu mersi ngabadu, SIÑOR; nsinan bu regras.

¹³ N ta ripiti ku vos altu tudu leis ku bu da.

¹⁴ N mas kontenti pa sigi bu nsinamentus di ki N tene manga di rikesa.

¹⁵ N na pensa diritu na bu ordis; N na pui sintidu na bu kamiñu.

¹⁶ N ta sinti sabi ku bu regras; N ka na diskisi di bu palabra.

Gimel

¹⁷ Fasi ben pa bu servu, pa N pudi vivi, N obdisi bu palabra.

¹⁸ Yabri ña uju pa N pudi oja kusas di dimira na bu lei.

¹⁹ N sedu ospri na mundu; ka bu sukundin bu mandamentus.

²⁰ Ña korson na yardi ku diseẑu di tene bu lei tudu ora.

²¹ Bu ta raprindi orgulyosu risu; kilis ku ta disvia di bu mandamentus e maldisuadu.

²² Pui jinti para koban mal ku disprezu, pabia N sigi bu nsinamentus.

²³ Ŝefis ta sinta, e fasi mau planus kontra mi, ma bu servu ta pensa diritu na bu regras.

²⁴ Bu nsinamentus i sabi pa mi; e sedu ña konsijaduris.

Dalet

²⁵ N batidu na reia; arnoba ña vida konformi bu palabra.

²⁶ N dau pasada kuma ku N yanda; bu kudin. Nsinan bu regras.

²⁷ Pun pa N pudi ntindi bu ordis; asin N ta pensa diritu na kusas garandi ku bu fasi.

²⁸ N sta kansadu ku tristesa; fortifikan konformi bu palabra.

²⁹ Libran di kamiñu di nganu; na bu bondadi nsinan bu lei.

³⁰ N kuji kamiñu di bardadi, N pui sintidu pa sigi bu leis.

³¹ N pega na bu nsinamentus; ka bu disan pa N pasa borgoña, SIÑOR.

³² N na kuri na kamiñu di bu mandamentus ora ku bu burin ntindimentu.

Hê

³³ O SIÑOR, nsinan sintidu di bu regras; asin N na guarda elis te na kabantada.

³⁴ Dan ntindimentu, N ta obdisi bu lei, N kumpril ku tudu ña korson.

³⁵ Judan yanda na kamiñu di bu mandamentus, pabia N ta sinti sabi nel.

³⁶ Pui ña korson pa i oja pa bu nsinamentus, pa i ka oja pa kubisa.

³⁷ Ka bu disa ña uju jubi-jubi kusa ku ka bali; arnoba ña vida konformi bu palabra.

³⁸ Kumpri bu purmesa pa mi, bu servu ku sta pruntu pa rispitau.

³⁹ Disvian di ki koba mal ku N medi, pabia bu leis i bon.

⁴⁰ N dija obi bu ordis; arnoban na bu retidon.

Vau

⁴¹ Bu bondadi pa i bin riba di mi, SIÑOR; salban, konformi bu palabra;

⁴² asin N ta sibi ruspundi kilis ku na koban mal, pabia N fiansa na bu palabra.

⁴³ Ka bu tira palabra di bardadi na ña boka, pabia N pui ña speransa na bu leis.

⁴⁴ Asin N na obdisi bu lei, tudu ora pa sempri.

⁴⁵ N na yanda na liberdadi, pabia N pui sintidu na bu ordis.

⁴⁶ N na papia di bu nsinamentus dianti di reis; N ka na burguñu.

⁴⁷ Bu mandamentus i sabi pa mi; N gosta ciu delis.

⁴⁸ N na lantanda mon pa risibi bu mandamentus ku N gosta del; N na pensa ciu na bu regras.

Zayin

⁴⁹ Lembra di palabra ku bu da bu servu, pabia bu fasin pa N ten speransa nel.

⁵⁰ Na ña sufrimentu, kil ku ta konsolan i es: kuma bu palabra i ta arnoba ña vida.

⁵¹ Jinti orgulyosu e fasin trosa ciu, ma nin ku ’sin, N ka disvia di bu lei.

⁵² O SIÑOR, N lembra di bu leis antigu, N sinti fortifikadu.

⁵³ Raiba forti toma konta di mi pabia di jinti mau ku bandona bu lei.

⁵⁴ Bu regras e sedu ña kantigas na tudu kau ku N mora.

⁵⁵ N lembra di bu nomi duranti noti, o SIÑOR; N obdisi bu lei.

⁵⁶ Asin ku ña vida sta; N ta obdisi bu mandamentus.

Et

⁵⁷ Abo i ña kiñon, o SIÑOR; N da purmesa pa kumpri bu palabras.

⁵⁸ N buska bu fabur ku tudu ña korson; sinti pena di mi, konformi bu palabra.

⁵⁹ N pensa na manera ku N na yanda, N riba pa bu nsinamentus.

⁶⁰ N janti, N ka tarda, pa obdisi bu mandamentus.

⁶¹ Grupus di bandidus maran ku kordas, ma N ka diskisi di bu lei.

⁶² Me-noti N ta lanta pa gardisiu pabia di bu leis justu.

⁶³ N sedu kumpañer di tudu kilis ku rispitau; ku ta sigi bu ordis.

⁶⁴ O SIÑOR, mundu inci ku bu bondadi; nsinan bu regras.

Tet

⁶⁵ Bu fasi ben pa bu servu, SIÑOR, konformi bu palabra.

⁶⁶ Dan bon juisu ku kuñisimentu, pabia N fia na bu mandamentus.

⁶⁷ Antis di N kastigadu, N ta yandaba mal, ma gosi N ta obdisi bu palabra.

⁶⁸ Abo i bon, bu ta fasi ben; nsinan bu regras.

⁶⁹ Jinti orgulyosu susan ku mintida, ma ami, N guarda bu ordis ku tudu ña korson.

⁷⁰ Se korson torna duru; e ka ta sinti; ma ami, bu lei i sabi pa mi.

⁷¹ I bon manera ku N kastigadu, pa N pudi nsina bu regras.

⁷² Lei ku sai na bu boka i mas minjor pa mi di ki milyaris di mueda di uru o di prata.

Jod

⁷³ Bu mon kumpun, i fasin ke ku N sedu; dan ntindimentu pa N pudi sibi bu mandamentus.

⁷⁴ Kilis ku rispitau e fika kontenti oca ke ojan, pabia N ten speransa na bu palabra.

⁷⁵ O SIÑOR, N sibi diritu kuma bu leis i justu. bu kastigan pabia bu sedu fiel.

⁷⁶ Bu bondadi pa i bin konsolan, konformi palabra ku bu da bu servu.

⁷⁷ Manda bu bondadi riba di mi, pa N pudi tene vida, pabia bu lei i sabi pa mi.

⁷⁸ Pui jinti orgulyosu pa e pasa borgoña, pabia e fasin mal, sin roson; ma ami, N na pensa na bu ordis.

⁷⁹ Kilis ku rispitau, pa e riba pa mi, ku kilis ku kunsi bu nsinamentus.

⁸⁰ N misti obdisi bu ordis ku korson retu, pa N ka bin pasa borgoña.

Kaf

⁸¹ N dismaja manera ku N na faima pa bu salbason, ma N pui ña fiansa na bu palabra.

⁸² Ña uju sta fraku manera ku N na pera bu purmesa; N ta punta: “Kal dia ku bu na konsolan?”

⁸³ Nin ku N sedu suma saku di kuru ku paña fumu, N ka na diskisi di bu regras.

⁸⁴ Kantu tempu ku bu servu ten ku pera? Kal dia ku bu na kastiga kilis ku na pirsigin?

⁸⁵ Jinti orgulyosu yabri koba pa mi, ku ka sta konformi bu lei.

⁸⁶ Tudu bu mandamentus i di fiansa. Inimigus na pirsigin ku mintida; judan!

⁸⁷ Kuas e kaba ku ña vida na mundu, ma ami, N ka disa bu ordis.

⁸⁸ Dan vida, konformi bu bondadi; N ta sigi bu palabras di nsinamentu.

Lâmed

⁸⁹ O SIÑOR, bu palabra sta firmadu na seu pa sempri.

⁹⁰ Abo i fiel pa tudu manjuandadi; bu kumpu mundu firmi pa sempri.

⁹¹ Tudu manti te aos konformi ordis ku bu da, pabia tudu kusas ta obdisiu.

⁹² Si bu lei ka sabiba pa mi, N ta pirdiba na ña sufrimentu.

⁹³ Nunka N ka na diskisi di bu ordis, pabia ku elis bu dan vida.

⁹⁴ Salban; ami i di bo, pabia N buska obdisi bu ordis.

⁹⁵ Jinti mau na pera pa kaba ku mi, ma N na pui sintidu na bu nsinamentus.

⁹⁶ N oja kuma tudu kusa, nin si i pirfitu, i ten si limiti, ma bu mandamentu ka ten limiti.

Mem

⁹⁷ N gosta ciu di bu lei; N ta pensa nel tudu ora.

⁹⁸ Bu mandamentus sta sempri ku mi, e ta fasin mas jiru di ki ña inimigus.

⁹⁹ N ten mas ntindimentu di ki tudu ña pursoris, pabia N ta pensa ciu na bu nsinamentus.

¹⁰⁰ N sedu mas jiru di ki jinti di idadi, pabia N obdisi bu ordis.

¹⁰¹ N disvia ña pe di tudu kamiñu mau, pa N pudi obdisi bu palabra.

¹⁰² N ka lunjusi di bu leis, pabia i abo propi ku nsinan.

¹⁰³ Bu palabra sabi dimas na ña boka, i mas mela di ki mel.

¹⁰⁴ N ngaña ntindimentu pabia di bu mandamentus; e ku manda N nuju tudu kamiñu di mintida.

Nun

¹⁰⁵ Bu palabra i lampada pa ña pe, i lus pa ña kamiñu.

¹⁰⁶ N jurmenta, N konfirma kuma N ten ku obdisi bu leis justu.

¹⁰⁷ N na sufri ciu; arnoba ña vida, SIÑOR, konformi bu palabra.

¹⁰⁸ O SIÑOR, seta ofertas voluntariu di ña boka; nsinan bu leis.

¹⁰⁹ Kontudu ña vida sta na pirigu tudu ora, N ka ta diskisi di bu lei.

¹¹⁰ Jinti mau pui armadilia pa mi, ma N ka disvia di bu ordis.

¹¹¹ N toma bu nsinamentus suma yardansa pa sempri, pabia e sedu kontentamentu di ña korson.

¹¹² N pui sintidu pa obdisi bu ordi, pa sempri, te na kabantada.

Sâmek

¹¹³ N ka ta kontenti ku jinti di dus sintidu, ma N gosta di bu lei.

¹¹⁴ Abo i ña kau suguru ku ña tajadera; N pui ña speransa na bu palabra.

¹¹⁵ Bo lunjusi di mi, abos ku ta fasi mal, pa N pudi obdisi mandamentus di ña Deus.

¹¹⁶ Suguran, konformi bu purmesa, pa N pudi tene vida; ka bu maina ña speransa.

¹¹⁷ Nguentan, pa N sedu salbu; asin N na pui sintidu sempri na bu ordis.

¹¹⁸ Bu ta nega tudu jinti ku ta disvia di bu regras, pabia se planus di nganu ka bali.

¹¹⁹ Tudu jinti mau di mundu, bu ta bota elis suma liŝu; e ku manda N gosta di bu nsinamentus.

¹²⁰ Ña kurpu na tirmi ku medu di bo; N ten medu ku rispitu pa bu leis.

Ayin

¹²¹ N fasi kusas justu i retu; ka bu ntregan na mon di ña kalkaduris.

¹²² Sedu fiadur di bu servu pa ben di si vida; ka bu disa jinti orgulyosu kalkan.

¹²³ Ña uju sta fraku, manera ku N na pera bu salbason ku bu purmesa justu.

¹²⁴ Trata bu servu konformi bu bondadi, bu nsinan bu regras.

¹²⁵ N sedu bu servu; dan jiresa pa N ntindi bu nsinamentus.

¹²⁶ O SIÑOR, i tempu pa bu toma midida; jinti na kebra bu lei.

¹²⁷ N gosta di bu mandamentus mas di ki uru, te uru mas puru.

¹²⁸ E ku manda N sibi kuma tudu bu ordis i retu; tambi N nuju tudu kamiñu falsu.

Pê

¹²⁹ Bu nsinamentus i di dimira; pabia di kila, N ta obdisi elis.

¹³⁰ Splikason di bu palabra ta da lus, i ta da ntindimentu pa kilis ku ka nsinadu.

¹³¹ N yabri ña boka, N da folgu kinti-kinti, pabia N dija bu mandamentus.

¹³² Vira pa mi, bu ten pena di mi, suma ku bu kustuma ta fasi ku kilis ku ama bu nomi.

¹³³ Gia ña pasu konformi bu palabra; ka bu disa nin un pekadu manda na mi.

¹³⁴ Libran di jinti ku ta kalka; asin N ta kumpri bu ordis.

¹³⁵ Pui bu rostu pa i numia bu servu, bu nsinan bu regras.

¹³⁶ Ña larmas na kuri suma rius, pabia jinti ka obdisi bu lei.

Tsadê

¹³⁷ Abo i justu, o SIÑOR; bu leis i retu.

¹³⁸ Nsinamentus ku ordis ku bu da e sedu retu, i di fiansa.

¹³⁹ Ña raiba na yardi na mi, pabia ña inimigus ka ta mporta ku bu palabra.

¹⁴⁰ Bu palabra i puru, i di fiansa; e ku manda bu servu gosta del.

¹⁴¹ Ami i ka ningin, N disprezadu, ma N ka ta diskisi di bu mandamentus.

¹⁴² Bu retidon ka na kaba; bu lei i bardadi.

¹⁴³ Fadiga ku sufrimentu toma konta di mi, ma bu mandamentus i sabi pa mi.

¹⁴⁴ Bu nsinamentus i justu sempri; dan ntindimentu pa N tene vida.

Kof

¹⁴⁵ N na comau ku tudu korson; sukutan, SIÑOR; N ta obdisi bu regras.

¹⁴⁶ N na comau; salban; N ta sigi bu nsinamentus.

¹⁴⁷ N ta lanta antis di sol mansi, N comau pa sakur; N pui ña speransa na bu palabra.

¹⁴⁸ Ña uju ta fika abertu tudu noti pa N pensa diritu na bu palabra.

¹⁴⁹ Obi ña vos, konformi bu bondadi; O SIÑOR, arnoba ña vida, konformi bu lei.

¹⁵⁰ Kilis ku ta yanda na maldadi e na ciga pertu; ma e sta lunju di bu lei.

¹⁵¹ O SIÑOR, bu sta pertu; tudu bu mandamentus i bardadi.

¹⁵² Aserka di bu nsinamentus, N sibi, disna di tempu antigu, kuma bu firmanta elis pa sempri.

Reŝ

¹⁵³ Jubi pa ña sufrimentu, bu libran, pabia N ka diskisi di bu lei.

¹⁵⁴ Difindi ña kasu, bu libran; arnoba ña vida konformi bu palabra.

¹⁵⁵ Salbason sta lunju di jinti mau, pabia e ka ta buska manera di kumpri bu regras.

¹⁵⁶ O SIÑOR, bu bondadi i garandi; arnoba ña vida konformi bu leis.

¹⁵⁷ N tene manga di pirsigidur ku inimigu, ma N ka ta disvia di bu nsinamentus.

¹⁵⁸ N oja ki jinti ku kebra lei, N fika ku kasabi, pabia e ka ta obdisi bu palabra.

¹⁵⁹ Jubi kuma ku N gosta di bu ordis, SIÑOR; arnoba ña vida konformi bu bondadi.

¹⁶⁰ Bu palabra i di bardadi disna di kumsada; kada un di bu leis justu i pa sempri.

Ŝin

¹⁶¹ Ŝefis ta pirsigin sin roson, ma ña korson ta rispita bu palabra.

¹⁶² N kontenti ku bu palabra, suma algin ku ta oja garandi rikesa.

¹⁶³ N nuju mintida, N ten odiu del, ma N gosta di bu lei.

¹⁶⁴ Seti bias kada dia N ta ngabau pa justisa di bu leis.

¹⁶⁵ Kilis ku gosta di bu lei e ten garandi pas; nada ka pudi pui elis pa e da tapada.

¹⁶⁶ O SIÑOR, N na pera pa bu salban; N ta kumpri bu mandamentus.

¹⁶⁷ N obdisi bu nsinamentus pabia N gosta ciu delis.

¹⁶⁸ N obdisi bu ordis ku bu nsinamentus, pabia bu kunsi tudu ña kamiñus.

Tau

¹⁶⁹ Disa ña vos ciga nunde bo, SIÑOR; dan ntindimentu konformi bu palabra.

¹⁷⁰ Disa ña rogu ciga bu dianti; libran konformi bu palabra.

¹⁷¹ Inci ña boka ku palabras pa ngabau, pabia bu nsinan bu regras.

¹⁷² Ña lingua na kanta aserka di bu palabra, pabia tudu bu mandamentus e sedu justu.

¹⁷³ Sakuran sempri ku bu mon, pabia N kuji bu ordis.

¹⁷⁴ O SIÑOR, N faima pa bu salbason; bu lei i kusa sabi dimas pa mi.

¹⁷⁵ Disan ku vida pa N ngabau; pui bu leis pa e judan.

¹⁷⁶ N na yanda-yanda suma karnel ku pirdi; bin bu buska bu servu, pabia N ka diskisi di bu mandamentus.