Salmus 118 - BIBLIA - traduson antigu in Krioulo

¹ Bo gardisi SIÑOR pabia el i bon; si bondadi i pa sempri.

² Israel pa i fala: “Si bondadi i pa sempri.”

³ Familia di Aron pa i fala: “Si bondadi i pa sempri.”

⁴ Kilis ku rispita SIÑOR pa e fala: “Si bondadi i pa sempri.”

⁵ N coma SIÑOR na foronta; SIÑOR obin, i libertan.

⁶ SIÑOR sta ku mi; N ka na medi. Ke ku omi pudi fasin?

⁷ SIÑOR sta ku mi; el i ña Judadur. N na bin oja ña inimigus ngañadu.

⁸ I minjor fiansa na SIÑOR di ki fiansa na omis.

⁹ I minjor fiansa na SIÑOR di ki fiansa na reis.

¹⁰ Tudu nasons tajan, ma na nomi di SIÑOR N kaba ku elis.

¹¹ E bin torna tajan na kada ladu, ma na nomi di SIÑOR N kaba ku elis.

¹² E tajan suma bagera, ma e pirdi forsa kinti-kinti suma fugu di fidida. Na nomi di SIÑOR N kaba ku elis.

¹³ N pincadu pa tras, tok N misti kai, ma SIÑOR judan.

¹⁴ SIÑOR i ña forsa, i ña kantiga, pabia i salban.

¹⁵ Bo sukuta gritus di kontentamentu ku vitoria ku na obidu na tendas di justu: “Mon direita di SIÑOR fasi kusas garandi!

¹⁶ Mon direita di SIÑOR i yalsadu; mon direita di SIÑOR fasi kusas garandi!”

¹⁷ N ka na muri, ma N na vivi pa konta kusas ku SIÑOR fasi.

¹⁸ SIÑOR kastigan duru, ma i ka ntregan pa mortu.

¹⁹ Yabrin porton di retidon; N na yentra nel, N gardisi SIÑOR.

²⁰ Es i porton di SIÑOR; jinti retu pudi yentra nel.

²¹ N na ngabau, pabia bu kudin, bu salban.

²² Pedra ku pedrerus nega i bin sedu purmeru pedra di kantu;

²³ es i kusa ku SIÑOR fasi, ku no oja, no dimira.

²⁴ Es i ki dia ku SIÑOR fasi; no kontenti ku alegria nel!

²⁵ O SIÑOR, no pidiu, salbanu! O SIÑOR, no pidiu pa bu danu sabura.

²⁶ Kil ku bin na nomi di SIÑOR i ta ngabadu. Di kasa di SIÑOR no na bensua bos.

²⁷ SIÑOR, el ki Deus; i danu lus. Bo toma kordas, bo mara limaria di sakrifisiu di festival, bo lebal te na pontas di altar.

²⁸ Abo i ña Deus, N na gardisiu; abo i ña Deus, N na garandisiu.

²⁹ Bo gardisi SIÑOR, pabia el i bon; si bondadi i pa sempri.