Salmus 115 - BIBLIA - traduson antigu in Krioulo

¹ I ka pa nos, SIÑOR, i ka pa nos, ma pa bu nomi ku gloria na dadu, pabia abo i bon i fiel.

² Ke ku manda nasons ta punta: “Nunde se Deus?”

³ No Deus sta na seu; i ta fasi tudu suma ki misti,

⁴ ma se idulus sedu prata ku uru, tarbaju di mon di omi.

⁵ E tene boka ma e ka ta papia; e tene uju ma e ka ta oja;

⁶ e tene oreja ma e ka ta obi; e tene naris ma e ka ta sinti ceru;

⁷ e tene mon, ma e ka ta palpa; e tene pe, ma e ka ta yanda; nin vos ka ta sai na se garganti.

⁸ Kilis ku kumpu ki idulus, ku tudu jinti ku fiansa nelis, e na torna elis!

⁹ Pobu di Israel, bo fiansa na SIÑOR; el i bo ajuda, i bo tajadera.

¹⁰ Familia di Aron, bo fiansa na SIÑOR; el i bo ajuda, i bo tajadera.

¹¹ Kilis ku rispita SIÑOR, bo fiansa nel; el i bo ajuda, i bo tajadera.

¹² SIÑOR ku ta lembra di nos, i na bensuanu. I na bensua pobu di Israel ku familia di Aron.

¹³ I na bensua tambi kilis ku rispita SIÑOR, jinti umildi ku jinti garandi.

¹⁴ SIÑOR pa i aumenta bos kada bias mas, abos ku bo fijus!

¹⁵ SIÑOR ku kumpu seu ku tera, pa i bensua bos!

¹⁶ Seu la riba i di SIÑOR, ma i da omis tera.

¹⁷ Kilis ku muri ka ta ngaba SIÑOR, nin kilis ku na ria pa mundu di mortus.

¹⁸ Ma anos ku sta bibu, no na fala ben di SIÑOR, disna di gosi pa sempri. Bo ngaba SIÑOR!