Salmus 109 - BIBLIA - traduson antigu in Krioulo

Salmu di Davi pa ŝef di musika.

¹ O Deus ku N ta ngaba, ka bu kala,

² pabia jinti mau e yabri se boka ku nganu, e konta mintida kontra mi.

³ E ta atakan na tudu ladu ku palabras di odiu, sin roson.

⁴ N ama elis, ma e sta kontra mi. Ami N ta ora.

⁵ E pagan mal pa ben, odiu pa ña amor.

⁶ Kuji un malvadu pa i sta kontra ña inimigu; pui kil ku na akusal na si mon direita.

⁷ Ora ki julgadu, pa i sai kondenadu; pa si orason ojadu suma pekadu.

⁸ Pa si dias kaba sedu; si pusison pa i dadu pa utru.

⁹ Si fijus pa e fika orfan, si minjer pa i fika viuva.

¹⁰ Pa si fijus yanda-yanda pa pidi simola; pa e serkadu di se kasas ku dana.

¹¹ Algin ki dibi pa i bin toma tudu ki tene; kil ki ngaña na si tarbaju, pa stranjerus lebal.

¹² Pa i ka ten kin ku na mostral bondadi, nin algin ku na toma konta di orfans ki fika.

¹³ Pa si jorson kortadu, pa i diskisidu na tempu di si fijus.

¹⁴ SIÑOR pa i lembra di maldadi di si papes; pekadu di si mame pa i ka purdadu,

¹⁵ ma ki pekadus, pa e fika sempri dianti di SIÑOR, pa i pudi korta lembransa di ki familia na tera.

¹⁶ Ki omi, nunka i ka lembra di mostra bondadi, ma i pirsigi koitadis, kilis ku ten falta, ku kilis ku tene korson kebrantadu, pa i pudi mata elis.

¹⁷ Suma i gosta di maldisua jinti, pa maldison bin riba del! I ka misti da benson; pa benson lunjusi del!

¹⁸ El i ta bisti di maldison suma kamisa; pa ki maldison yentra na si kurpu suma yagu, pa i yentra na si os suma azeiti.

¹⁹ Ki maldison pa i kubril suma panu, suma sintu ki ta mara sempri.

²⁰ Es pa i sedu pagamentu di SIÑOR pa ña akusaduris, ku kilis ku ta papia mal kontra mi.

²¹ Ma abo, SIÑOR Deus, difindi pa mi pabia di bu nomi; libran, pabia abo i bon, bu ta sinti pena.

²² Ami i koitadi, N ten falta; Dentru di ña korson N na sinti dur.

²³ N na pirdi suma sombra di tardi; N fercadu lunju suma gamfañoti.

²⁴ Ku manga di junjun, ña juju na fraksi; magresa toma konta di ña kurpu.

²⁵ Elis e ta njutin; si e ojan, e ta balansa kabesa.

²⁶ O SIÑOR ña Deus, sakuran, bu salban, konformi bu bondadi,

²⁷ pa e pudi sibi kuma i bu mon ku fasi e kusa.

²⁸ E pudi maldisua, ma abo, bu na bensua. Kilis ku lanta kontra mi, pa e kunfundidu, ma ami, bu servu, pun pa N sta kontenti.

²⁹ Ña akusaduris pa e bisti ku borgoña, pa se propi kunfuson kubri elis suma panu.

³⁰ N na yalsa fála pa garandisi SIÑOR, N na ngabal na metadi di juntamentu,

³¹ pabia i ta firma na direita di koitadi, pa libral na mon di kilis ku na kondenal pa mortu.