Salmus 108 - BIBLIA - traduson antigu in Krioulo

¹ Ña korson sta firmi, o Deus; di tudu ña korson N na kanta salmus pa ngabau.

² Salteriu ku arpa, bo disperta! Ami N na korda sol pa i lanta!

³ N na ngabau, SIÑOR, na metadi di jinti, N na kanta pa bo na metadi di nasons,

⁴ pabia bu bondadi i garandi, i ta bai te na seu; bu bardadi ta ciga, i pasa nuvens mas altu.

⁵ O Deus, mostra bu garandesa riba di seu, ku bu gloria riba di tudu mundu.

⁶ Salbanu ku bu mon direita, bu obinu, pa kilis ku bu ama pudi libertadu.

⁷ Deus papia na si kau sagradu, i fala: “Ku kontentamentu N na rapati Siken, N midi kobon di Sukot.

⁸ Jilead ku Manasés i di mi; Efrain i forsa di ña kabesa; Judá i ña bingala di renansa.

⁹ Moab i ña basia di laba; N na bota ña sapatu riba di Edon; N na kontenti ku ña vitoria riba di Filistia.”

¹⁰ Kin ku na leban pa prasa forti? Kin ku na gian te na Edon,

¹¹ suma abo, o Deus, bu neganu? Gosi bu ka ta sai ku no tropas.

¹² Judanu kontra no inimigus, pabia ajuda di omi ka bali.

¹³ Ku Deus na no ladu no na ngaña vitoria, pabia el i na masa no inimigus.