Salmus 106 - BIBLIA - traduson antigu in Krioulo

¹ Bo ngaba SIÑOR! Bo gardisi SIÑOR pabia el i bon; si bondadi i pa sempri.

² Kin ku pudi konta kusas di puder ku SIÑOR fasi? Kin ku pudi tene palabra ku ciga pa ngabal?

³ Sortiadu i kilis ku ta manti se retidon, ku sempri ta fasi kil ki diritu.

⁴ Lembra di mi, SIÑOR, ora ku bu mostra fabur pa bu pobu; bin judan ora ku bu na salba elis,

⁵ pa N pudi mati ora ku kusas na kuri diritu pa kilis ku bu kuji, pa N pudi sta alegri juntu ku bu nason, pa N kanta ku kontentamentu ku ki pobu ku bu yarda.

⁶ No peka suma no papes; no yara, no yanda mal.

⁷ No papes ka pui sintidu na ki milagris ku bu fasi na Ejitu, nin e ka lembra di ki manga di bias ku bu mostra elis amor. E bin sedu disobdienti lungu di Mar Burmeju,

⁸ ma Deus salba elis pa amor di si nomi, pa si puder pudi kunsidu.

⁹ I da ordi pa Mar Burmeju; kila seku. I pui elis pasa na metadi di mar suma e staba na con seku.

¹⁰ I salba elis na mon di kilis ku tenba odiu delis; i libra elis di puder di inimigu.

¹¹ Yagu bin kubri kilis ku staba kontra elis; nin un delis ka sobra ku vida.

¹² Asin e bin fia na si palabras, e kanta pa ngabal.

¹³ I ka tarda, e diskisi ke ki fasi, e ka pera pa si konsiju.

¹⁴ Kubisa bin toma konta delis na lala; e bin tenta Deus la.

¹⁵ El i da elis ke ke pidi, ma i bin pui elis pa e magru ku duensa.

¹⁶ Na kampamentu e bin ten nveẑa di Moisés, ku Aron ku konsagradu pa SIÑOR.

¹⁷ Con yabri, i nguli Datan, i kubri Abiran ku si jinti.

¹⁸ Fugu toma konta di ki grupu, i kema jinti mau.

¹⁹ Na Oreb e kumpu un bakasiñu di uru, e adora ki imaẑen.

²⁰ Asin e torkia gloria di se Deus ku imaẑen di turu ku ta kume paja.

²¹ E diskisi di Deus se Salbadur, ku fasiba garandi kusas na Ejitu,

²² ki milagris na tera di Kan, ku kusas meduñu ki fasi na Mar Burmeju.

²³ I fala kuma i na kaba ku elis, ma Moisés, kil ki kuji, i bai dianti di Deus pa tajal, pa disvia si raiba, pa ka i bin kaba ku elis.

²⁴ Dipus, e njuti ki tera sabi; e ka fia na kil ku Deus fala,

²⁵ ma, dentru di se tendas, e ŋuniŋuni, e nega obdisi SIÑOR.

²⁶ Asin i yalsa si mon kontra elis, i jurmenta kuma i na pui elis pa e kai na lala,

²⁷ tambi i na pui se jorson kai na metadi di nasons; i na pajiga elis pa utru teras.

²⁸ Dipus, e bai junta ku Baal-Peor, e kume karni ku roniadu pa deusis ku ka tene vida.

²⁹ Asin e lantanda si raiba ku kil ke fasi; duensa meduñu bin rebenta na se metadi.

³⁰ Fineias bin lanta, i kastiga kilis ku peka; duensa bin para.

³¹ Pabia des i ojadu justu; asin ki na ojadu pa sempri.

³² Dipus, e lantanda raiba di SIÑOR lungu di yagu di Meribá. Pabia delis, Moisés pasa mal,

³³ pabia e pui Moisés kasabi na si korson, tok i papia sin pensa.

³⁴ E ka bin kaba ku ki nasons ku SIÑOR fala pa kaba ku elis,

³⁵ ma e bin jagasi ku elis, e nsina se manera.

³⁶ E yentra na kultu di idulus di ki jinti, ku bin sedu armadilia pa elis.

³⁷ E bin sakrifika se fijus macu ku femia pa dimonius.

³⁸ E darma sangi di jinti ku ka ten kulpa, ku sedu se propi fijus macu ku femia ke sakrifika na idulus di Kanaan. Asin, tera kontaminadu ku sangi.

³⁹ Elis propi e kontamina ku kusas ke fasi; e bai kai cai ku idulus.

⁴⁰ Pabia di kila, SIÑOR paña raiba ku si propi pobu, tok i nuju elis, ku sedu si yardansa,

⁴¹ i ntrega elis na puder di utru nasons; kilis ku ten odiu delis e bin manda riba delis.

⁴² Se inimigus kalka elis, e pui elis bas di se puder.

⁴³ Manga di bias Deus libra elis, ma e ntema na se disobdiensia; e torna fraku pabia di se pekadu.

⁴⁴ Ma Deus obi se gritus, i para sintidu na se foronta.

⁴⁵ I lembra di si kontratu, i sinti pena delis, pabia di si garandi bondadi.

⁴⁶ I pui jinti ku leba elis katibu pa e sinti pena delis.

⁴⁷ O SIÑOR no Deus, salbanu, bu juntanu, bu libranu di nasons, pa no pudi gardisi bu nomi sagradu, no kontenti ora ku bu na ngabadu.

⁴⁸ SIÑOR, Deus di Israel, pa i ngabadu, antis di kumsada te dipus di kabantada! Tudu jinti pa e fala: “Amen!” Bo ngaba SIÑOR!