Salmus 105 - BIBLIA - traduson antigu in Krioulo

¹ Bo ngaba SIÑOR, bo coma si nomi; bo konta na metadi di nasons kusas ki fasi.

² Bo kanta pa el, bo ngabal ku kantiga, bo papia di tudu kusa garandi ki fasi.

³ Bo njata na si nomi sagradu. Kilis ku na buska SIÑOR, pa e kontenti na se korson.

⁴ Bo buska SIÑOR, bo buska si forsa; bo buska si pursensa sempri.

^5-6 Abos, jorson di si servu Abraon, abos, fijus di Jakó, kilis ki kuji, Bo lembra di kusas garandi ki fasi, si milagris ku si palabras di julgamentu.

⁷ El i SIÑOR no Deus; si julgamentus e sta na tudu parti di mundu.

⁸ I ta lembra sempri di si kontratu, ki palabra ki firmanta pa tudu tempu;

⁹ Ki kontratu ki fasi ku Abraon, ki juramentu ki fasi pa Isak.

¹⁰ I konfirmal pa Jakó suma lei, i dal pa Israel suma kontratu ku ka ta kaba;

¹¹ i fala: “N na dau tera di Kanaan pa bu tenel suma kiñon di bu yardansa.”

¹² Bo seduba inda puku na numeru, puku omis, ospris na tera.

¹³ Bo papes e yanda-yanda di un nason pa utru, di un renu pa utru.

¹⁴ Deus ka disa ningin kalka elis; pa amor delis i raprindi reis, i fala:

¹⁵ “Ka bo toka na ña unjidus, nin ka bo fasi ña anunsiaduris mal.”

¹⁶ I coma fomi pa i bin na tera; i korta se manera di oja kumida,

¹⁷ ma i mandaba ja un omi pa i bai dianti, ku sedu José, ku bindidu suma katibu.

¹⁸ Si pes pertadu ku korenti; i pudu feru na garganti,

¹⁹ tok kusa ki kontaba ja i bin sedu; palabra di SIÑOR proba kuma i bardadi.

²⁰ Kil ku tenba forsa riba di nasons, ku sedu rei di Ejitu, i manda largal.

²¹ I pul suma ŝef di si gubernu, pa i manda riba di tudu ki tene,

²² pa i ten otridadi riba di utru ŝefis, pa nsina si konsijaduris.

²³ Dipus Jakó, ku sedu Israel, i bai pa Ejitu, i vivi suma ospri na tera di Kan.

²⁴ Deus pui si pobu pa e padi ciu; i fasi elis forti mas di ki se inimigus.

²⁵ I muda korson di ki inimigus pa e torna kontra si pobu, pa e trata si servus ku nganu.

²⁶ I manda si servu Moisés, i kuji tambi Aron.

²⁷ Elis e fasi sinalis ku milagris di Deus na se metadi, la na tera di Kan.

²⁸ Deus manda sukuru; tera fika sin klaridadi. Moisés ku Aron ka nega obi palabra di Deus.

²⁹ Deus bidanta yagu di Ejitu sangi, ku pui pis muri.

³⁰ Manga di sapu sai na tera, tok e yentra na kuartus di durmi di ŝefis.

³¹ Deus papia; i bin nuvens di moska, ku karanga ku inci tudu se tera.

³² I bidanta se cuba na cuba di pedra, ku relampagu na tudu parti di tera.

³³ I ataka se ortas di uva ku di figu, i kebra arvuris di se tera.

³⁴ Deus papia; gamfañotis bin, manga del, ku ka pudi kontadu.

³⁵ E kume tudu paja na tera, tudu prudutu di se con.

³⁶ Deus mata tudu purmeru fijus na se tera, ku sedu purmeru frutu di forsa di kada omi. 5

³⁷ I tira Israel fora, ku kargus di prata ku uru. Na tudu se jorson i ka tenba kil ki fraku.

³⁸ Ejipsius e kontenti oca ke sai, pabia medu di Israel tomaba konta delis.

³⁹ Deus distindi un nuven pa i kubri elis, ku fugu pa numia elis di noti.

⁴⁰ E pidi; i pui manga di kodorniz pa e bin; i fartanda elis ku kumida di seu.

⁴¹ I yabri pedra garandi; yagu sai nel, i kuri na con seku suma riu,

⁴² pabia i lembra di si purmesa sagradu ki da si servu Abraon.

⁴³ Asin ki tira si pobu ki kuji; e fika kontenti, e grita ku alegria.

⁴⁴ I da elis teras di utru nasons; e bai toma konta di lugaris ku utru jinti tarbaja.

⁴⁵ I da elis ki tera pa e pudi obdisi si ordis ku si leis. Bo ngaba SIÑOR!