Salmus 103 - BIBLIA - traduson antigu in Krioulo

Salmu di Davi.

¹ O ña alma, fala ben di SIÑOR! Tudu ku sta na mi, fala ben di si nomi santu.

² O ña alma, fala ben di SIÑOR! Ka bu diskisi di nin un di kusas bon ki fasi.

³ I el ku ta purda tudu ña pekadus, i ta kura tudu ña duensas.

⁴ I el ku ta libra ña vida di koba di mortu, i ta bensuan ku amor ku bondadi.

⁵ I el ku ta fartandan ku kumida sabi, tok N ta bida sempri nobu suma agia.

⁶ SIÑOR ta fasi kusas justu; i ta fasi justisa pa tudu kilis ku kalkadu.

⁷ I ta mostraba Moisés si planus, i ta fasi kusas garandi pa fijus di Israel pudi ojal.

⁸ SIÑOR ta mostra miserikordia ku bondadi; i ta tarda pa paña raiba, i ten garandi amor.

⁹ I ka ta raprindi tudu ora, nin i ka ta guarda si raiba pa sempri.

¹⁰ I ka ta tratanu konformi no pekadus mersi, nin i ka na paganu konformi no maldadi.

¹¹ Suma ku seu sta muitu altu, lunju di tera, asin ku si bondadi i garandi pa kilis ku rispital.

¹² Suma ku saida di sol ku si kaida sta lunju di ŋutru, asin ku SIÑOR ta lunjusinu no pekadus.

¹³ Suma pape ta sinti amor pa si fijus, asin ku SIÑOR ta sinti amor pa kilis ku rispital,

¹⁴ pabia i sibi kuma ku no kumpudu; i ta lembra kuma anos i reia.

¹⁵ Omi, si dias i suma paja; i ta kirsi bonitu suma flor na matu,

¹⁶ ma ora ku bentu supra riba del, i ta pirdi; i ka ta ojadu mas na si lugar.

¹⁷ Antis di kumsada te dipus di kabantada, bondadi di SIÑOR sta riba di kilis ku rispital; si retidon sta riba delis ku se fijus ku netus,

¹⁸ kilis ku ta guarda si kontratu, ku ta lembra di obdisi si mandamentus.

¹⁹ SIÑOR firmanta si tronu na seu, si renu ta domina riba di tudu.

²⁰ Bo fala ben di SIÑOR, abos, si anjus forti, puderosu, ku ta obdisi si ordis ku si palabra.

²¹ Bo fala ben di SIÑOR, abos si tropas di seu, abos, si ministrus ku ta fasi tudu ki misti.

²² Bo fala ben di SIÑOR, abos, tudu si kriaturas, na tudu lugar di si renu. O ña alma, fala ben di SIÑOR!