Salmus 102 - BIBLIA - traduson antigu in Krioulo

Orason di un omi forontadu ku misti dismaja, i darma si keŝa dianti di SIÑOR.

¹ SIÑOR, obi ña orason; disa ña vos pa i ciga na bo.

² Ka bu sukundin bu rostu na dia di ña foronta. Para oreja pa mi; na dia ku N comau, janti pa kudin.

³ Ña dias na disparsi suma fumu; ña os na yardin suma fugu.

⁴ Ña korson molostadu, i seku suma paja, tok N ta diskisi di kume.

⁵ Manera ku N ta jimi ku dur, ña os pega ku peli.

⁶ N parsi suma kacu na lala, suma kuruẑa na kasa ku danadu.

⁷ N ta dita, N ka ta durmi; N sedu suma kacu dingidu riba di kankra.

⁸ Ña inimigus ta koban tudu ora; kilis ku ten raiba kontra mi e ta maldisuan.

⁹ I sinsa ku sedu ña kumida; kil ku N na bibi i ta jagasi ku larma,

¹⁰ pabia di bu garandi raiba, pabia bu yalsan, bu kumsa fercan.

¹¹ Ña dias na pasa suma sombra di tardi; N na seku suma paja.

¹² Ma abo, SIÑOR, bu sedu Rei pa sempri; tudu manjuandadi na kunsi bu fama.

¹³ Bu na lanta, bu sinti pena di Sion; pabia tempu markadu pa mostral fabur i ciga ja.

¹⁴ Bu servus ten amor pa pedras di Sion, e sinti pena di si reia.

¹⁵ Nasons na rispita nomi di SIÑOR; tudu reis di mundu na rispita si gloria,

¹⁶ ora ku SIÑOR torna kumpu Sion, i mostra si gloria.

¹⁷ I na ruspundi orason di kil ku bandonadu, i ka na njuti si rogu.

¹⁸ Skirbi e kusas pa pobu di futuru, pa jinti ku ka padidu inda pudi ngaba SIÑOR.

¹⁹ SIÑOR, na si kau sagradu la riba na seu, i mpina, i jubi pa tera,

²⁰ pa obi kuma ku katibus na jimi, pa kaplinti kilis ku kondenadu pa mortu.

²¹ Asin si nomi na anunsiadu na Sion, i na ngabadu na Jerusalen

²² ora ku nasons ku renus junta pa adora SIÑOR.

²³ Na metadi di ña vida i kebra ña forsa, i korta ña dias.

²⁴ Ami N fala: “Ña Deus, ka bu leban na metadi di ña vida. Abo, bu anus ta yangasa tudu manjuandadi.

²⁵ Disna di kumsada bu pui alisersus di tera; seus i tarbaju di bu mon.

²⁶ E na disparsi, ma abo bu na kontinua. Tudu elis e na beju suma ropa; suma ropa e na torkiadu; ki beju na botadu,

²⁷ ma abo bu sedu mesmu; bu anus ka ta kaba.

²⁸ Fijus di bu servus na kontinua; se jorson na firmantadu bu dianti.”