Saida 7 - BIBLIA - traduson antigu in Krioulo

¹ SIÑOR fala Moisés: “N fasiu suma Deus pa Faraó; bu ermon Aron i na sedu bu anunsiadur.

² Abo bu na fala tudu ku N mandau; Aron, bu ermon, i na papia ku Faraó pa i disa fijus di Israel pa e sai na si tera.

³ Ma N na pui korson di Faraó pa i risu. N na fasi manga di sinal ku milagri na tera di Ejitu,

⁴ ma Faraó ka na obi bos. Ami N na pui ña mon riba di Ejitu ku garandi julgamentu. N na tira ña jorsons, ku sedu ña pobu Israel, di tera di Ejitu.

⁵ Ejipsius na sibi kuma ami N sedu SIÑOR ora ku N distindi ña mon kontra Ejitu, N tira fijus di Israel na se metadi.”

⁶ Moisés ku Aron e fasi suma ku SIÑOR fala elis.

⁷ Oca ke na papia ku Faraó, Moisés teneba oitenta anu, Aron oitenta i tris.

Manduku di Aron bida kobra

⁸ SIÑOR papia ku Moisés ku Aron, i fala ellis:

⁹ “Ora ku Faraó fala bos pa bo fasi kualker milagri, abo Moisés bu na fala Aron pa i toma si manduku, i botal dianti di Faraó; i na bida kobra.”

¹⁰ Moisés ku Aron bai pa Faraó, e fasi konformi SIÑOR da elis ordi. Aron bota si manduku dianti di Faraó ku si ŝefis; i bida kobra.

¹¹ Faraó tambi i coma si omis jiru ku jambakusis. Kilas fasi mesmu kusa ku se jambakusndadi,

¹² pabia kada un delis bota si manduku na con; i bida kobra, ma manduku di Aron i nguli di selis.

¹³ Ma korson di Faraó bida risu; i nega sukuta elis, suma ku SIÑOR falaba ja.

Korson di Faraó bida risu

¹⁴ SIÑOR fala Moisés: “Korson di Faraó ntemus; i nega disa pobu pa e bai.

¹⁵ Bai parmaña pa Faraó, ora ki na bai pa riu Nilu. Bai si dianti bu peral na praia di riu. Leba na bu mon ki manduku ku bidaba kobra,

¹⁶ bu fala Faraó: ‘SIÑOR, Deus di ebreus, ku mandan pa bo, i fala: “Disa ña pobu pa e bai, pa e sakrifika pa mi na lala.” Te gosi bu ka obi.

¹⁷ SIÑOR fala kuma e kusa na mostra kuma el i SIÑOR. Ku e manduku ku N tene na mon N na suta yagu di riu; i na bida sangi.

¹⁸ Pis ku sta na riu na muri; riu na cera mal. Ejipsius na fika njuadu tok e ka ta pudi bibi yagu di riu.’ ”

Praga di sangi

¹⁹ SIÑOR fala Moisés pa i fala Aron: “Toma bu manduku, bu distindi mon riba di yagu di Ejitu, riba di si rius garandi ku pikininu, ku laguas ku tudu juntamentu di yagu, pa i bida sangi, pa sangi pudi ten na tudu tera di Ejitu, na putis di madera ku di pedra.”

²⁰ Moisés ku Aron e fasi suma ku SIÑOR da elis ordi. Aron lantanda si manduku dianti di uju di Faraó ku si ŝefis, i suta yagu ku staba na riu. Tudu yagu di riu bida sangi.

²¹ Pis ku staba na riu muri; riu fedi; ejipsius ka pudiba bibi yagu di riu. I tenba sangi na tudu tera di Ejitu.

²² Ma jambakusis di Ejitu e fasi mesmu ku se jambakusndadi, di manera ku korson di Faraó torna mas risu; i ka obi elis, suma ku SIÑOR falaba ja.

²³ I rabida, i bai pa si palasiu, i ka pui nada de kusas na si korson.

²⁴ Tudu ejipsius koba fontis pertu di riu pa e pudi oja yagu di bibi, pabia e ka pudiba bibi ki yagu di riu.

²⁵ Seti dia pasa dipus di SIÑOR dana yagu di riu.