Saida 40 - BIBLIA - traduson antigu in Krioulo

Deus da ordi pa tenda lantandadu

¹ SIÑOR papia ku Moisés, i falal:

² “Lantanda tabernakulu, tenda di juntamentu, na purmeru dia di purmeru mis.

³ Pui arka di kontratu nel, bu kubril ku kurtina.

⁴ Miti mesa dentru del, bu pui na ordi kusas ku ta bai riba del. Pui tambi kanderu nel, bu pegandal.

⁵ Pui altar di uru pa nsensu dianti di arka di kontratu, bu pindra kurtina na entrada di tenda.

⁶ “Pui altar pa oferta kemadu dianti di porta di tenda di juntamentu.

⁷ Pui basia na metadi di tenda di juntamentu ku altar, bu inci yagu nel.

⁸ Dipus bu ta pui tapada na roda, bu pindra kurtina na entrada di kintal.

⁹ “Toma azeiti di unson, bu unji tenda ku tudu ku sta nel, bu dedikal ku tudu si material; asin i ta sedu sagradu.

¹⁰ Unji tambi altar di oferta kemadu ku tudu si material, bu dedikal; asin altar na sedu kusa sagradu dimas.

¹¹ Unji tambi basia ku si pe, bu dedikal.

¹² “Pui Aron ku si fijus pa e ciga na porta di tenda di juntamentu, bu laba elis ku yagu,

¹³ bu bisti Aron ropa sagradu, bu unjil, bu dedikal, pa i pudi fasin tarbaju di saserdoti.

¹⁴ Ciganta tambi si fijus, bu bisti elis se kamisotis,

¹⁵ bu unji elis suma ku bu unji se pape, pa e pudi fasin tarbaju di saserdoti. Se unson na fasi elis saserdotis, elis ku se jorson pa sempri.”

¹⁶ Moisés fasi tudu kusa konformi SIÑOR mandal.

Tenda lantandadu

¹⁷ Asin, na purmeru dia di purmeru mis di sugundu anu, tenda lantandadu.

¹⁸ Moisés lantandal, i pui si pes, i yarma si firkijas, i pui se travesas nelis.

¹⁹ I distindi kubertura riba di tenda, i pui utru kubertura riba del, konformi SIÑOR dal ordi.

²⁰ I toma ki dus tagua di mandamentu, i pui elis na arka, i miti varas na anilias di arka, i pui kubertura di miserikordia riba del.

²¹ I leba arka pa tenda, i pindra kurtina pa kubri arka, suma ku SIÑOR da ordi.

²² I pui mesa na tenda di juntamentu, na ladu di norti, fora di kurtina.

²³ Riba del i ruma pon dianti di SIÑOR konformi SIÑOR dal ordi.

²⁴ I pui kanderu na tenda di juntamentu, na ladu di sul, dianti di mesa,

²⁵ i peganda lus dianti di SIÑOR, konformi SIÑOR dal ordi.

²⁶ I pui altar di uru na tenda di juntamentu, dianti di kurtina.

²⁷ I kema nsensu ku ta cera sabi riba del, konformi SIÑOR dal ordi.

²⁸ Dipus i pindra kurtina na porta di tenda.

²⁹ I pui altar di oferta kemadu na porta di tenda di juntamentu, i kema limarias riba del, ku ofertas di kumida, konformi SIÑOR dal ordi.

³⁰ I pui basia na metadi di tenda di juntamentu ku altar, i pui yagu nel, pa laba.

³¹ Moisés ku Aron ku si fijus e laba mon ku pe nel.

³² Ora ke na yentraba na tenda di juntamentu, o si e na bai pa altar, e ta lababa, konformi ordi ku SIÑOR da Moisés.

³³ Moisés lantanda tapada na roda di tenda ku altar, i pindra kurtina na entrada di kintal. Asin Moisés kaba tudu tarbaju.

Nuven kubri tenda

³⁴ Nuven bin kubri tenda di juntamentu; gloria di SIÑOR inci tabernakulu,

³⁵ tok Moisés ka pudiba yentra na tenda di juntamentu, manera ku nuven sinta riba del; tabernakulu inciba ku gloria di SIÑOR.

³⁶ Na tudu bias di fijus di Israel, ora ku nuven lanta riba di tenda, e ta pegaba kamiñu.

³⁷ Si nuven ka lanta, e ka ta kontinua se bias te na dia ki lanta.

³⁸ Asin, ki nuven di SIÑOR staba riba di tenda di dia; fugu staba riba del di noti, dianti di uju di tudu pobu di Israel, na tudu se bias.