Saida 38 - BIBLIA - traduson antigu in Krioulo

Altar pa oferta kemadu

¹ I kumpu tambi altar pa oferta kemadu, di madera di akasia, kuadradu, di 2,2 metru di kumprimentu, 2,2 metru di largura ku 1,3 metru di altura.

² Na si kuatru kantu i labra cifris ku forma un pesa son ku altar, i kubril ku kobri.

³ I kumpu tudu si material di kobri: si kusas ku ta mitidu pa paña sinsa, si pás, basias, garfus ku fugarerus.

⁴ I kumpu grelias di redi, di kobri, pa altar, nunde ku fugu pudi sinta nel, ku pudi ciga na metadi di altura di altar.

⁵ I kumpu kuatru anilia di kobri pa kuatru kantu di redi, pa varas pudi pasa nelis.

⁶ I kumpu varas di madera di akasia, i kubri elis ku kobri.

⁷ I miti varas na anilias na ladus di altar pa kargal ku el. I kumpu altar di taguas, sin nada dentru.

Basia di kobri

⁸ Ku spijus di minjeris ku ta tarbajaba na porta di tenda di juntamentu i kumpu basia di kobri ku si pe di kobri.

Kintal di tenda

⁹ Pa tapa kintal di tenda na ladu di sul, i kumpu kurtinas di liñu finu tursidu, di 44 metru di kumprimentu.

¹⁰ Se vinti firkija ku se vinti pe e seduba di kobri. Ansolis ku kusas na firkijas ku ansolis ta pindra nel e seduba di prata.

¹¹ Na ladu di norti i kumpu kurtinas di 44 metru di kumprimentu. Se vinti firkija ku se vinti pe e seduba di kobri. Ansolis ku kusas na firkijas ku ansolis ta pindra nel e seduba di prata.

¹² Na ladu di kintal pa kaida di sol i tenba kurtinas di 22 metru di kumprimentu, ku se des firkija ku se des pe. Ansolis ku kusas na firkijas ke ta pindra nel e seduba di prata.

¹³ Na ladu di saida di sol i tenba kurtinas di 22 metru di kumprimentu.

^14-15 Na kada ladu di entrada i tenba 6,6 metru di kurtinas ku tris firkija ku se tris pe.

¹⁶ Tudu kurtinas ku tapa kintal e seduba di liñu finu tursidu.

¹⁷ Pes di firkijas seduba di kobri. Ansolis ku kusas na firkijas ke ta pindra nel e seduba di prata. Parti di riba di kada firkija i kubridu ku prata. Firkijas juntadu ku ŋutru ku bandas di prata.

¹⁸ Kurtina di porta di kintal i kumpuduba di lan azul, purpura ku burmeju, ku liñu finu tursidu, bordadu pa algin ku sibi ki tarbaju. I teneba 9 metru di kumprimentu; suma kurtinas di kintal i teneba 2 metru di altura.

¹⁹ Si kuatru firkija ku kuatru pe e seduba di kobri. Si ansolis ku parti di riba di kada firkija, ku si moldus, e seduba di prata.

²⁰ Tudu stakas pa tenda, tambi pa tapada di kintal, e seduba di kobri.

Material ku usadu

²¹ Es i kuantia di metal ku usadu pa tenda di tustumuñu. Moisés da ordi pa i kontadu; levitas, bas di Itamar, fiju di saserdoti Aron, e skirbi e relatoriu.

²² Bezaleel, fiju di Uri, fiju di Ur, di jorson di Judá, i kumpu tudu ku SIÑOR manda Moisés.

²³ Aoliab tarbaja ku el, ku sedu fiju di Aisamak, di jorson di Dan, mestre di tarbaju, ku ten jitu na tarbaju di artista, ku sibi borda ku lan azul, purpura ku burmeju, ku liñu finu.

²⁴ Uru di oferta ku dadu pa tarbaju di kau sagradu i seduba 1.000 kilu konformi midida ofisial di kau sagradu.

²⁵ Prata ku risibidu di jinti di kumunidadi ku markadu na resensiamentu i sedu 3.430 kilu konformi midida ofisial di kau sagradu.

²⁶ Kada omi di idadi di vinti anu pa riba, oca ki pasa na resensiamentu, i da un beka di prata, ku sedu metadi di un siklu konformi midida ofisial. Numeru di jinti ku pasa i sedu 603.550.

²⁷ Di ki prata, 3.400 kilu usadu pa kumpu sen pe pa firkijas di kau sagradu, tambi di kurtina, 34 kilu pa kada pe.

²⁸ Ku ki 30 kilu di prata ku sobra, Bezaleel kumpu ansolis ku moldus, i kubri parti di riba di firkijas.

²⁹ Kobri di oferta pa SIÑOR i seduba 2.425 kilu.

³⁰ Ku el i kumpu pes di porta di tenda di juntamentu, ku altar di kobri, ku si grelia di kobri, ku tudu material di altar,

³¹ ku pes di tapada na roda, ku pes di porta di kintal, ku stakas di tenda ku di tapada.