Saida 37 - BIBLIA - traduson antigu in Krioulo

Arka

¹ Bezaleel kumpu arka di madera di akasia di 110 sentimetru di kumprimentu, 70 di largura ku 70 di altura.

² I kubril ku uru puru dentru ku fora, i pui koroa di uru na si roda.

³ I kumpu kuatru anilia di uru pa el, i fiksa elis na kuatru pe, dus na un ladu ku dus na utru ladu.

⁴ I kumpu varas di madera di akasia, i kubri elis ku uru.

⁵ I miti varas na anilias na ladu di arka pa pudi kargal.

Kubertura di miserikordia

⁶ I kumpu tambi kubertura di miserikordia di uru puru, di 110 sentimetru di kumprimentu ku 70 di largura.

⁷ I kumpu tambi dus kirubin di uru batidu na ponta di kada ladu,

⁸ un kirubin na un ponta, utru na utru ponta. E forma un pesa son ku kubertura di miserikordia.

⁹ Ki kirubins e distindi se asas pa riba, e kubri kubertura di miserikordia ku elis. E na jubi ŋutru riba del.

Mesa

¹⁰ I kumpu mesa di madera di akasia, di 88 sentimetru di kumprimentu, 44 di largura ku 66 di altura.

¹¹ I kubril ku uru puru, i pui koroa di uru na si roda.

¹² I kumpu tambi un moldu na si roda ku tene largura di kuatru dedu; i fasi koroa di uru na roda di ki moldu.

¹³ I kumpu tambi kuatru anilia di uru, i fiksa elis na kuatru ponta nunde ku si pes sta.

¹⁴ Ki anilias, ku varas ta mitidu nelis pa karga mesa, e pudu lungu di moldu.

¹⁵ Ki varas pa ba ta karga mesa ku el e kumpudu ku madera di akasia e kubridu ku uru.

¹⁶ Ku uru puru i kumpu material pa mesa, ku sedu pratus, kopus, tiẑelas ku jarus ku ta usadu pa darma ofertas di bibida.

Kanderu

¹⁷ I kumpu tambi kanderu di uru puru batidu, ku ramus, tudu ku pe. Si bokas staba suma floris ku sta ficadu, utrus yabri; ma tudu kanderu formadu na un pesa son.

¹⁸ Seis ramu sai na si ladus, tris na un ladu, tris na utru.

¹⁹ Na kada un di ki seis ramu i tenba tris boka ku parsi ku flor di amenduiña, utru ficadu, utru ku yabri.

²⁰ Na kanderu propi i tenba kuatru boka ku parsi ku flor di amenduiña, utrus ficadu, utrus ku yabri.

²¹ I tenba un flor ficadu bas di kau nunde ku purmeru dus ramu sai nel; utru flor ficadu i staba bas di kau nunde ku sugundu dus ramu sai nel; terseru flor ficadu i staba bas di kau nunde ku terseru dus ramu sai nel.

²² Ki floris ficadu ku ki ramus ku tudu kanderu i seduba un pesa son, di uru puru batidu.

²³ I fasi seti lus pa kanderu. Si material di limpal ku si apagaduris e seduba di uru puru.

²⁴ I kumpu kanderu ku tudu si material ku trinta i kuatru kilu di uru puru.

Altar di nsensu

²⁵ I kumpu altar di nsensu di madera di akasia, kuadradu, di 45 sentimetru di kumprimentu, 45 di largura ku 90 di altura. El ku si cifris e formaba un pesa son.

²⁶ I kubri parti di riba, tudu ladus ku cifris, ku uru puru. I kumpu un koroa di uru na si roda.

²⁷ I kumpu pa el dus anilia di uru pa dus ladu, i fiksa elis bas di koroa, pa varas ki na kargadu ku el pudi pasa.

²⁸ I kumpu varas ku madera di akasia, i kubri elis ku uru.

Azeiti di unson ku nsensu

²⁹ I kumpu tambi azeiti sagradu di unji, ku nsensu puru ku ta cera sabi; i kumpudu suma tarbaju di algin ku ta kumpu purfumu.