Saida 36 - BIBLIA - traduson antigu in Krioulo

¹ “Asin, Bezaleel ku Aoliab, ku tudu omis jiru ku SIÑOR da jiresa ku kapasidadi pa e sibi fasi tudu tarbaju pa konstruson di kau sagradu, e ten ku fasi tarbaju konformi tudu ku SIÑOR manda.”

Ofertas di pobu

² Moisés coma Bezaleel ku Aoliab, ku tudu omis jiru ku Deus daba kapasidadi, ku staba pruntu na se korson pa bin fasi ki tarbaju.

³ E toma na mon di Moisés tudu ofertas ku fijus di Israel tisi pa tarbaju di kau sagradu. Inda pobu na tisiba ofertas tudu dia parmaña di se libri vontadi.

⁴ Asin tudu ki omis jiru ku na fasiba tudu tarbaju na kau sagradu e disa se tarbaju,

⁵ e bai pa Moisés, e falal: “Jinti tisi oferta ciu dimas pa tarbaju ku SIÑOR manda fasi, tok i pasa.”

⁶ Asin Moisés da ordi pa konta rekadu na tudu parti di kampamentu pa ka nin omi nin minjer tisi mas oferta pa kau sagradu. Asin pobu tujidu tisi mas oferta,

⁷ pabia i tenba manga di material ku ciga pa tarbaju ke dibi di fasi; mesmu asin i na sobra.

Kau sagradu

⁸ Tudu omis mas jiru na metadi di kilis ku na fasiba tarbaju e kumpu tenda ku des kurtina di liñu finu tursidu, ku lan azul, purpura ku burmeju, ku kirubins bordadu nelis pa un omi ku sibi ki tarbaju.

⁹ Tudu kurtinas teneba mesmu midida: 12,3 metru di kumprimentu ku 1,75 metru di largura.

¹⁰ E junta sinku kurtina na ŋutru; ki utru sinku tambi e junta elis na ŋutru.

¹¹ E fasi pasaderas di azul na ponta di un kurtina di kabantada di ki sinku juntadu; e fasi mesmu na ponta di kabantada di ki utru sinku juntadu.

¹² E fasi sinkuenta pasadera na un kurtina, ku sinkuenta na ponta di utru kurtina, filadu ku ŋutru.

¹³ Dipus e fasi sinkuenta ansol di uru, e usa elis pa junta ki kurtinas na ŋutru. Asin i bin sedu un tenda son.

¹⁴ E fasi tambi onzi kurtina di kabelu di kabra suma kubertura di tenda.

¹⁵ E fasi elis tudu di mesmu midida: 13,2 metru di kumprimentu ku 1,75 metru di largura.

¹⁶ E junta sinku kurtina aparti; e junta tambi ki utru seis.

¹⁷ E fasi sinkuenta pasadera na ponta di ultimu kurtina di ki sinku juntadu; e fasi tambi sinkuenta na ponta di kurtina di ki seis juntadu.

¹⁸ E fasi tambi sinkuenta ansol di kobri pa junta kubertura, pa i sedu un son.

¹⁹ E kumpu tambi pa tenda un kubertura di kurus di karnel macu, tinjidu di burmeju. Riba di kila e pui un kubertura di kurus di baka di yagu.

²⁰ E kumpu firkijas pa tenda, di madera di akasia.

²¹ Kada firkija teneba 4,4 metru di kumprimentu ku 70 sentimetru di largura.

²² Kada firkija teneba dus po na ladu ku ta liga ku si kumpañer. E fasi mesmu na tudu firkijas di tenda.

²³ E kumpu vinti tagua pa ladu di sul di tenda.

²⁴ E fasi korenta pe di prata pa bai bas, dus pa kada firkija, ku si dus po na ladu.

²⁵ E fasi vinti firkija na ladu di norti di tenda,

²⁶ ku se korenta pe di prata, dus pe bas di kada firkija.

²⁷ Na ladu di tenda pa kaida di sol e kumpu seis firkija.

²⁸ E kumpu tambi dus firkija pa kantus di tenda na dus ladu.

²⁹ Ki dus firkija di kantu e kumpudu na mesmu manera. Di bas pa riba e juntadu na un anilia.

³⁰ Asin i tenba oitu firkija ku se disaseis pe di prata, dus pe bas di kada firkija.

³¹ E kumpu tambi travesas di madera di akasia, sinku pa firkijas na un ladu di tenda,

³² sinku pa firkijas di utru ladu, ku mas sinku pa firkijas di ladu di tras di tenda, pa kaida di sol.

³³ E kumpu travesa di metadi pa i pasa na metadi di firkijas di un ponta di tenda pa utru.

³⁴ E kubri firkijas ku uru, e kumpu anilias di uru pa travesas pudi pasa nel. E kubri travesas tambi ku uru.

Kurtinas ku firkijas

³⁵ E kumpu tambi kurtina di lan azul, purpura ku burmeju, ku liñu finu tursidu, bordadu ku kirubins pa un omi ku sibi ki tarbaju.

³⁶ E kumpu pa kurtina kuatru firkija di madera di akasia, kubridu ku uru, ku ansolis di uru, ku kuatru pe di prata.

³⁷ Pa porta di tenda e kumpu utru kurtina di lan azul, purpura ku burmeju, ku liñu finu tursidu, bordadu pa algin ku sibi ki tarbaju,

³⁸ ku si sinku firkija ku si ansolis. Parti di riba di firkijas i kubridu ku uru, suma tambi se moldus. Se sinku pe e seduba di kobri.