Saida 35 - BIBLIA - traduson antigu in Krioulo

Dia di diskansu

¹ Moisés junta tudu fijus di Israel, i fala elis: “Es i kusas ku SIÑOR manda pa bo fasi.

² Tarbaju ta fasidu na seis dia, ma setimu i dia sagradu pa bos, i sabadu di diskansu pa SIÑOR. Algin ku fasi tarbaju na ki dia i na matadu.

³ Ka bo peganda fugu na kualker di bo moransas na dia di diskansu.”

Ofertas pa tenda

⁴ Moisés papia mas ku tudu juntamentu di fijus di Israel, i fala: “Es i ordi ku SIÑOR da:

⁵ Bo da un oferta pa SIÑOR di kil ku bo tene. Kada un ku tene korson pruntu i na tisi pa SIÑOR oferta di uru, prata ku kobri,

⁶ suma tambi lan azul, purpura ku burmeju, ku liñu finu, ku kabelu di kabra,

⁷ kurus di karnel macu tinjidu di burmeju, ku kurus di baka di yagu, madera di akasia,

⁸ azeiti di olivera pa kanderus, kusas ku ta cera sabi pa azeiti di unson, tambi pa nsensu ku ta cera sabi,

⁹ pedras sardonika ku utru pedras di balur ku na mitidu na uru di efodi ku di pitural.

Material pa tenda

¹⁰ “Tudu artista jiru na bo metadi i ten ku bin fasi kusa ku SIÑOR manda:

¹¹ tabernakulu ku si tenda ku kuberturas, ansolis, taguas, travesas, firkijas ku se pes,

¹² arka ku si varas, kubertura di miserikordia ku kurtinas ku ta kubril,

¹³ mesa ku si varas, ku tudu si material ku pon sagradu,

¹⁴ kanderu pa da lus, ku si material, ku si lusis ku azeiti pa pui dentru,

¹⁵ altar di nsensu ku si varas, azeiti di unson ku nsensu ku ta cera sabi, kurtina pa entrada di tenda,

¹⁶ altar pa oferta kemadu, ku si grelias di kobri, si varas ku tudu si material, basia di kobri ku si pe,

¹⁷ kurtinas di kintal ku firkijas ku se pes, kurtina pa porta di entrada di kintal,

¹⁸ stakas ku se kordas pa tenda, tambi pa kurtinas na roda di kintal,

¹⁹ ropa tisidu pa tarbaju di kau sagradu, ku sedu ropa sagradu pa saserdoti Aron ku ropa pa si fijus, ora ke fasi tarbaju di saserdoti.”

Pobu tisi se ofertas

²⁰ Tudu juntamentu di Israel pajiga, e fika Moisés.

²¹ Tudu jinti ku se korson staba tokadu, ku teneba spiritu di pruntidon, e bin tisi se oferta pa SIÑOR pa kumpu tenda di juntamentu, pa tudu tarbaju di tenda, ku ropa sagradu.

²² Asin, tudu omis ku minjeris, ku se korson staba pruntu, e tisi fivelas, fius di garganti ku di mon, anelis, ku tudu tipu di ornamentu di uru; kada un pursenta si oferta di uru pa SIÑOR.

²³ Tudu algin ku teneba lan azul, purpura o burmeju, liñu finu, kabelu di kabra, kuru di karnel tinjidu di burmeju, o kuru di baka di yagu, i tisil.

²⁴ Tudu algin ku na pursenta oferta di prata o di kobri i lebalba suma oferta pa SIÑOR. Tudu algin ku teneba madera di akasia i ta lebalba pa kualker parti di tarbaju.

²⁵ Tudu minjer jiru ku sibi fia lan i leba kil ki fiaba, ku sedu lan azul, purpura o burmeju, o liñu finu.

²⁶ Tudu minjer ku si korson staba tokadu, ku sibiba fia kabelu di kabra, i fasil.

²⁷ Ŝefis tisi pedras sardonika ku utru pedras di balur, ku na mitidu na uru di efodi ku di pitural.

²⁸ E tisi tambi azeiti pa kanderu, ku kusas ku ta cera sabi pa oliu di unson, tambi pa nsensu ku ta cera sabi.

²⁹ Tudu omi ku minjer di Israel ku se korson staba tokadu, ku sinti vontadi pa leba oferta pa tarbaju ku SIÑOR manda, pa boka di Moisés, pa i fasidu, e leba ki kusas di se libri vontadi suma oferta pa SIÑOR.

Deus coma Bezaleel ku Aoliab

³⁰ Moisés fala fijus di Israel: “Jubi, SIÑOR coma Bezaleel, fiju di Uri, fiju di Ur, di jorson di Judá,

³¹ i incil ku Spiritu di Deus, i dal jiresa ku ntindimentu ku kuñisimentu na tudu tarbaju di artesanatu,

³² pa i sedu mestre di diseñu pa tarbaja ku uru ku prata ku kobri,

³³ pa korta pedras di balur, pa miti elis na uru, pa labra madera, tambi pa tudu tipu di tarbaju di artesanatu.

³⁴ Deus dal tambi, el ku Aoliab, fiju di Aisamak, di jorson di Dan, pruntidon di nsina utrus.

³⁵ I inci elis ku jiresa pa e sedu mestre di diseñu ku manga di koldadi tarbaju, suma bordadu, tarbaju ku lan azul, purpura ku burmeju, ku liñu finu, ku tarbaju di tisi panu.