Saida 31 - BIBLIA - traduson antigu in Krioulo

Bezaleel ku Aoliab

¹ SIÑOR fala Moisés:

² “N coma nomi di Bezaleel, fiju di Uri, fiju di Ur, di jorson di Judá,

³ N incil ku Spiritu di Deus, ku kapasidadi, ku jiresa ku kuñisimentu pa tudu tarbaju di artista,

⁴ pa i sedu mestre di diseñu pa tarbaja ku uru ku prata ku kobri,

⁵ pa korta pedras di balur ku na mitidu na uru, pa labra madera, tambi pa tudu tipu di tarbaju di artesanatu.

⁶ N kuji juntu ku el Aoliab, fiju di Aisamak, di jorson di Dan. N da tambi kapasidadi pa tudu omi jiru, pa e pudi fasi tudu ku N mandau,

⁷ ku sedu tenda di juntamentu, arka di kontratu, kubertura di miserikordia ku sta riba del, ku tudu mobilia di tenda,

⁸ mesa ku si material, kanderu di uru puru ku tudu si material, altar di nsensu,

⁹ altar di oferta kemadu ku tudu si material, basia ku si pe,

¹⁰ ropa tisidu bonitu suma ropa sagradu di saserdoti Aron, ku ropa di si fijus, pa fasi tarbaju di saserdoti,

¹¹ ku azeiti di unji, ku nsensu ku ta cera sabi pa kau sagradu; e na fasi tudu ku N mandau.”

Dia di diskansu

¹² SIÑOR fala Moisés

¹³ pa i papia ku fijus di Israel, i fala elis: “Bo ten ku guarda ña dias di diskansu, pabia i sinal na metadi di mi ku bos pa sempri, pa bo sibi kuma ami i SIÑOR ku separa bos pa bo sedu ña pobu.

¹⁴ Asin, bo guarda dia di diskansu pabia i sagradu pa bos. Algin ku ka tratal suma dia sagradu, ma i tarbaja nel, i na matadu.

¹⁵ Seis dia bu pudi fasi bu tarbaju, ma setimu dia i sabadu di diskansu, sagradu pa SIÑOR. Algin ku fasi tarbaju na dia di diskansu i ten ku matadu.

¹⁶ Asin, fijus di Israel ten ku guarda dias di diskansu suma dias sagradu, di un tempu pa utru, suma kontratu ku ka ta kaba.

¹⁷ Na no metadi, ami ku fijus di Israel, i na sedu un sinal pa sempri, pabia na seis dia SIÑOR kumpu seu ku tera, ma na setimu dia i para tarbaja, i diskansa.”

Dus tagua di tustumuñu

¹⁸ Oca ku Deus kaba papia ku Moisés na monti Sinai, i dal dus tagua di pedra nunde ku Deus skirbi lei ku si propi dedu.