Saida 30 - BIBLIA - traduson antigu in Krioulo

Altar di nsensu

¹ “Kumpu un altar di madera di akasia pa kema nsensu nel.

² I na sedu kuadradu, di 45 sentimetru di kumprimentu, 45 sentimetru di largura ku 90 sentimetru di altura. El ku si cifris e na forma un pesa son.

³ Kubri si parti di riba, ku tudu ladus ku cifris, ku uru puru, bu fasi koroa di uru na tudu si roda.

⁴ Kumpu dus anilia di uru pa dus ladu, bu fiksa elis bas di koroa. Varas ki na lebadu ku el e na ba ta pasa nelis.

⁵ Kumpu varas ku madera di akasia, bu kubri elis ku uru.

⁶ Pui altar na frenti di kurtina ku pindradu dianti di kubertura di miserikordia ku sta riba di arka di kontratu nunde ku N na kontra ku bo.

⁷ “Tudu dia parmaña, ora ku Aron yentra pa purpara kanderus, i na kema, riba di altar, nsensu ku ta da bon ceru.

⁸ Ora ku Aron ciga di tardi pa sindi kanderu, i ten ku kema nsensu utru bias; ki nsensu i ten ku kemadu sempri dianti di SIÑOR, sin para.

⁹ Ka bo pursenta kualker nsensu strañu riba di ki altar, nin oferta di limaria kemadu, nin di kumida, nin ka bo darma oferta di bibida riba del.

¹⁰ Un bias na kada anu Aron ten ku fasi sirmonia pa purifika altar; i ten ku pui na si kuatru cifri sangi di limarias ku sakrifikadu pa purdon di pekadu. Es ten ku fasidu kada anu pa sempri. I un kusa sagradu dimas pa SIÑOR.”

Pagamentu pa vida

¹¹ SIÑOR fala Moisés:

¹² “Ora ku bu na marka kabesa di fijus di Israel, kada un delis i na da SIÑOR un pagamentu di si vida ora ki na kontadu, pa i ka bin ten nin un praga na se metadi ora ke na markadu.

¹³ Tudu kil ku pasa na rolamentu i ten ku da metadi di un siklu di prata, konformi siklu ofisial di kau sagradu (un siklu i sedu vinti jera). Ki metadi di siklu i oferta pa SIÑOR.

¹⁴ Kualker algin ku pasa na rolamentu, di vinti anu pa riba, i na da ki oferta pa SIÑOR.

¹⁵ Algin riku i ka na buri; algin koitadi i ka na da menus di ki metadi di un siklu, ora ke na da oferta pa SIÑOR pa fasi pagamentu pa vida.

¹⁶ Bu na toma diñeru di pagamentu di vida na mon di fijus di Israel, bu na gastal na tarbaju di tenda di juntamentu. E pagamentu pa bo vida i na lembranta SIÑOR aserka di fijus di Israel.”

Basia di kobri

¹⁷ SIÑOR fala Moisés:

¹⁸ “Kumpu tambi un basia di kobri, ku si pe di kobri, pa laba. Pul na metadi di altar ku tenda di juntamentu, bu pui yagu nel.

¹⁹ Aron ku si fijus e na ba ta laba mon ku pe nel.

²⁰ Ora ke na yentra na tenda di juntamentu, e na laba ku yagu, pa ka e bin muri. Tambi, ora ke na ciga na altar pa fasi tarbaju di kema oferta pa SIÑOR,

²¹ e na laba mon ku pe pa ka e bin muri. Es i na sedu lei pa el ku si jorson pa sempri.”

Azeiti sagradu di unji

²² SIÑOR papia mas ku Moisés, i falal:

²³ “Toma kusas ku mas ta cera sabi: 6 kilu di mira puru, 3 kilu di kanela aromatiku, 3 kilu di kálamu aromatiku,

²⁴ 6 kilu di kasia (tudu pesadu konformi pesu ofisial) ku 4 litru di azeiti di olivera,

²⁵ bu fasi ku elis azeiti sagradu pa unji jinti. Bu na mistura e kusas suma algin ku na kumpu purfumu. I na sedu azeiti sagradu di unji.

²⁶ Usal pa unji tenda di juntamentu, arka di kontratu,

²⁷ mesa ku tudu si material, kanderu ku si material, altar di nsensu,

²⁸ altar di oferta kemadu ku tudu si material, ku basia ku si pe.

²⁹ Asin bu na purifika e kusas pa e sedu muitu sagradu. Tudu ku toka nelis i na sedu sagradu.

³⁰ “Unji Aron ku si fijus, bu separa elis pa e tarbaja pa mi suma saserdotis.

³¹ Papia ku fijus di Israel, bu fala elis: ‘Es i na sedu ña azeiti sagradu di unson pa sempri.

³² Un omi kualker ka pudi untadu ku el, nin ka bo fasi utru purfumu ku mesmu reseta. I un kusa sagradu; bo tenel suma un kusa sagradu.

³³ Kualker algin ku kumpu azeiti suma es, o i bai unta algin ku ka sedu saserdoti, i na tiradu na metadi di si pobu.’ ”

Nsensu sagradu

³⁴ SIÑOR fala Moisés: “Toma e kusas ku ta cera sabi: storaki, oniŝa ku gálbanu; toma tambi nsensu puru, kada un na mesmu midida,

³⁵ bu kumpu nsensu ku elis, suma algin ku ta fasi purfumu. Buri sal, pa i sedu puru i sagradu.

³⁶ Un parti del, bu na pilal pa i bida suma foriña, bu na waga utru dianti di arka di kontratu na tenda di juntamentu nunde ku N na kontra ku bo. I na sedu sagradu dimas pa bos.

³⁷ Ka bo fasi utru nsensu di mesmu reseta pa bo propi usu. Bo tenel suma un kusa sagradu pa SIÑOR.

³⁸ Kualker omi ku fasi utru purfumu suma es pa i ba ta ceral, i ta tiradu na metadi di si pobu.”