Saida 26 - BIBLIA - traduson antigu in Krioulo

Tenda di adorason kumpudu ku kurtinas

¹ “Kumpu tenda di des kurtina di liñu finu tursidu, ku lan azul, purpura ku burmeju, tudu kumpudu ku kirubins bordadu nel pa un omi ku sibi ki tarbaju.

² Tudu kurtinas na tene mesmu midida; kada un na tene 12,3 metru di kumprimentu ku 1,75 metru di largura.

³ Sinku kurtina na juntadu ku ŋutru; ki utru sinku tambi e na juntadu ku ŋutru.

⁴ Fasi pasaderas azul na ponta di kurtina di kabantada di ki sinku juntadu; na mesmu manera bu na fasi na ponta di ki utru sinku juntadu.

⁵ Bu na fasi sinkuenta pasadera na un kurtina, tambi sinkuenta na utru kurtina, filadu ku ŋutru.

⁶ Fasi sinkuenta ansol di uru pa mposta kurtinas na ŋutru, pa tenda pudi sedu un son.

⁷ “Kumpu tambi onzi kurtina di kabelu di kabra pa kubri ki utru kurtinas di tenda.

⁸ Tudu ki onzi kurtina e na tene mesmu midida, ku sedu 13,2 metru di kumprimentu ku 1,75 metru di largura.

⁹ Junta sinku kurtina na ŋutru; mesmu tambi ku ki seis kurtina. Ki sestu, bu na dobral na parti di frenti di tenda.

¹⁰ Fasi sinkuenta pasadera na ponta di kurtina di kabantada di ki sinku juntadu, ku mas sinkuenta na ponta di kurtina di kabantada di ki seis ku juntadu.

¹¹ Fasi tambi sinkuenta ansol di kobri pa mposta elis na pasaderas pa junta kubertura, pa i pudi sedu un son.

¹² Metadi di kil ku sobra na pindradu na parti di tras di tenda.

¹³ Di ki un metru ku sobra di kumprimentu di kurtinas, metadi ta kai riba di un ladu di tenda, utru metadi ta kai na utru ladu, pa kubril.

¹⁴ Kumpu tambi un kubertura di kurus di karnel macu, tinjidu burmeju, ku utru kubertura di kuru di baka di yagu ku na bai riba di tudu.

Taguas di tenda

¹⁵ “Fasi tambi firkijas di madera di akasia.

¹⁶ Kada firkija na tene 4,4 metru di kumprimentu ku 66 sentimetru di largura.

¹⁷ Kada firkija di tenda na tene dus po na ladu ku ta ligal ku si kumpañer.

¹⁸ Kumpu vinti firkija pa ladu di sul di tenda.

¹⁹ Kumpu tambi korenta pe di prata pa pui bas di ki vinti firkija; dus pe na pudu bas di un firkija, ku si dus po na ladu.

²⁰ Na ladu di norti di tenda bu na kumpu tambi vinti firkija,

²¹ ku se korenta pe di prata, dus pe bas di kada firkija.

²² Kumpu seis firkija na ladu di kaida di sol,

²³ ku mas dus pa kantus di tras, un na kada ladu.

²⁴ Ki dus firkija di kantu na kumpudu na mesmu manera; di bas pa riba e na juntadu na un anilia.

²⁵ Asin i na ten oitu firkija ku se disaseis pe di prata, dus pe bas di kada firkija.

²⁶ “Kumpu sinku travesa di madera di akasia pa firkijas di un ladu di tenda,

²⁷ ku sinku pa firkijas di utru ladu, suma tambi sinku pa firkijas na ladu di tras di tenda, pa kaida di sol.

²⁸ Travesa di metadi na pasa na metadi di firkijas di un ponta di tenda pa utru.

²⁹ Kubri firkijas ku uru, bu kumpu tambi anilias di uru ku travesas na bin pasa nelis. Bu kubri tambi ki travesas ku uru.

³⁰ Lantanda tenda konformi planta ku bu mostradu na monti.

Kurtina di kau mas sagradu

³¹ “Kumpu tambi un kurtina di lan azul, purpura ku burmeju ku liñu finu tursidu, bordadu ku kirubins pa un omi ku sibi ki tarbaju.

³² Pindral ku ansolis di uru na kuatru firkija di madera di akasia kubridu ku uru, firmadu na kuatru pe di prata.

³³ Ki kurtina pindradu ku ki ansolis na rapati kau sagradu ku kau mas sagradu. Dipus bu ta pui arka di kontratu dentru di ki kurtina.

³⁴ Pui kubertura di miserikordia riba di arka di kontratu na kau mas sagradu.

³⁵ Pui mesa fora di kurtina na ladu di norti di tenda, bu pui kanderu na frenti di mesa na ladu di sul.

³⁶ “Na entrada di tenda bu na pui un kurtina di lan azul, purpura ku burmeju, ku liñu finu tursidu, bordadu pa algin ku sibi ki tarbaju.

³⁷ Pa e kurtina bu na kumpu anilias di uru ku sinku firkija di madera di akasia kubridu ku uru, ku se pes di kobri.