Saida 25 - BIBLIA - traduson antigu in Krioulo

Deus manda tisi ofertas pa tenda

¹ SIÑOR fala Moisés:

² “Fala fijus di Israel pa e junta oferta, e tisin. Bu na risibi na mon di tudu omi ku sinti na si korson pa da.

³ Es i koldadi di oferta ku bu na risibi na se mon: uru, prata, kobri,

⁴ lan di tris kor, ku sedu azul, purpura ku burmeju, liñu finu, kabelu di kabra,

⁵ kurus di karnel macu tinjidu di burmeju, kurus di baka di yagu, madera di akasia,

⁶ azeiti pa kanderu, kusas ku ta cera sabi pa oliu ku jinti ta unjidu ku el, tambi pa nsensu,

⁷ ku pedras di balur suma sardonika, pa miti na efodi ku pitural di saserdoti.

⁸ “E na kumpun un kau sagradu pa N pudi mora na se metadi.

⁹ Bu na kumpul ku tudu si mobilia konformi planta ku N na mostrau.

Arka di kontratu

¹⁰ “E na fasi un arka di madera di akasia, di 1,1 metru di kumprimentu, ku 70 sentimetru di largura ku di altura.

¹¹ Bu na kubril ku uru puru dentru ku fora, bu na pui koroa di uru na si roda.

¹² Bu na tarbaja kuatru anilia di uru pa el, bu fiksa elis na kuatru pe, dus anilia na kada ladu.

¹³ Bu na kumpu tambi varas di madera di akasia, bu na kubri elis ku uru.

¹⁴ Bu na miti varas na ki anilias na ladus di arka, pa pudi karga arka ku elis.

¹⁵ Ki varas na fika na anilias di arka, e ka na tiradu.

¹⁶ Dentru di arka bu na pui taguas ku mandamentus ku N na bin dau.

Kubertura di miserikordia

¹⁷ “Bu na kumpu tambi un kubertura di miserikordia, di uru puru, di 1,1 metru di kumprimentu, ku 70 sentimetru di largura.

¹⁸ Kumpu dus kirubin di uru batidu na ponta di kada ladu,

¹⁹ un kirubin na un ponta, utru na utru ponta. E na kumpudu juntu ku kubertura di miserikordia, pa forma un pesa son.

²⁰ Ki kirubins na distindi se asas pa riba, e kubri kubertura di miserikordia ku elis; e na jubi ŋutru riba del.

²¹ Dipus ku bu pui ki taguas ku mandamentus ku N na dau, bu na pui kubertura di miserikordia riba di arka.

²² La N na bin pa bo, riba di kubertura di miserikordia na metadi di dus kirubin ku sta riba di arka di tustumuñu. N na papia ku bo, N na dau tudu ña ordis pa fijus di Israel.

Mesa di madera di akasia

²³ “Kumpu un mesa di madera di akasia, di 88 sentimetru di kumprimentu, 44 sentimetru di largura ku 66 di altura,

²⁴ bu kubril ku uru puru, bu pui koroa di uru na si roda.

²⁵ Kumpu tambi un moldu na si roda di largura di kuatru dedu; bu fasi un koroa di uru na roda di ki moldu.

²⁶ Bu na kumpu tambi kuatru anilia di uru, bu fiksa elis na kuatru ponta nunde ku si pes sta.

²⁷ Ki anilias, ku varas na mitidu nelis pa karga mesa, e ten ku sta lungu di moldu.

²⁸ Bu na kumpu varas di madera di akasia, bu kubri elis ku uru; mesa na kargadu ku elis.

²⁹ Bu na kumpu si pratus ku si kopus, si jarus ku tiẑelas, tudu di uru puru, pa usa ku ofertas di bibida.

³⁰ Riba di mesa bu na pui pon sagradu ku na sta sempri ña dianti.

Kanderu

³¹ “Kumpu tambi un kanderu di uru puru, batidu, kurpu tudu ku pe. Si bokas na sta suma floris ku sta ficadu, utrus ku yabri; ma tudu kanderu na formadu na un pesa son.

³² Seis ramu na sai na ladus di kanderu, tris na un ladu, tris na utru.

³³ Na kada un de seis ramu i na ten tris boka ku parsi ku flor di amenduiña, utrus ficadu, utrus ku yabri.

³⁴ Ma na kanderu propi i na ten kuatru boka ku parsi ku flor di amenduiña, utrus ficadu, utrus ku yabri.

³⁵ I na ten un flor ficadu bas di kau nunde ku ki purmeru dus ramu sai nel. Utru flor ficadu na sta bas di sugundu kau nunde ku dus ramu sai nel; terseru flor ficadu na sta bas di kau nunde ku terseru dus ramu sai nel.

³⁶ Ki floris ficadu ku ki ramus ku tudu kanderu i na sedu un pesa son di uru puru batidu.

³⁷ “Tambi bu na kumpu seti lus pa kanderu, bu na pui elis pa e ba ta numia pa dianti.

³⁸ Si instrumentus di limpal ku si apagaduris e na sedu di uru puru.

³⁹ Na trinta i kuatru kilu di uru puru bu na kumpu kanderu ku tudu si material.

⁴⁰ Jubi diritu pa bu fasi elis suma planta ku bu mostradu na monti.