Saida 22 - BIBLIA - traduson antigu in Krioulo

Leis aserka di torna kusas di jinti

¹ “Si algin furta turu o karnel, i matal o i bindil, i na paga sinku turu pa ki un son; pa karnel i na paga kuatru.

^2-4 I ten ku paga tudu. Si i ka tene, i ta bindidu pa pudi paga si furtu. Si limaria ojadu bibu na si mon, ku sedu turu o buru o karnel, i ta paga dus. Si ladron pañadu na fura kasa, i molostadu, i muri, kin ku molostal i ka kulpadu di si mortu, ma si i matadu oca sol mansi ja, kin ku matal i kulpadu.

⁵ “Si algin disa si baka kume paja na un lugar o na orta di uvas, si i largal, i bai kume na kau di utru algin, i na paga ku minjor frutu di si propi lugar ku si orta di uvas.

⁶ “Si kau bin pega fugu ku bin paña paja brabu, tok i kema maraduras di trigu, o kil ku sta ja maduru, o i dana lugar tudu, kin ku peganda fugu i na paga tudu ku kemadu.

⁷ “Si algin da si visiñu prata o utru kusas di balur pa i rakada, si ki kusa bin furtadu na kasa di ki omi, si ladron bin ojadu, i ta paga dus bias,

⁸ ma si ladron ka ojadu, dunu di kasa i ta lebadu dianti di juisis pa jubi si i ka pui mon na kusas di si visiñu.

⁹ “Tudu kiston aserka di turu, o buru, o karnel, o ropa, o kualker kusa ku pirdi, ku algin pega, ma utru fala kuma i di sil, elis dus e na leba se kasu pa juisis. Kil ku juisis fala kuma i ka ten roson, i na paga dus bias pa si kumpañer.

¹⁰ “Si algin ntrega si visiñu un buru, o turu, o karnel, o kualker limaria pa i tenel, si ki limaria bin muri, o i molostadu, o i kapli sin ningin ka ojal,

¹¹ e ten ku bai, elis dus, dianti di SIÑOR, pa kil ku tenel jurmenta kuma i ka furta limaria di si visiñu. Si dunu ta setal; ki utru ka na pagal,

¹² ma si i furtadu na si mon, i na paga si dunu.

¹³ Si i limaria brabu ku mata ki limaria, visiñu ta leba padas di karni pa da proba. Asin i ka na paga dunu pa ki limaria ku matadu.

¹⁴ “Si algin pista limaria di si visiñu, i bin molosta o i muri na ora ku dunu ka sta, kil ku pistal i na pagal.

¹⁵ Ma si dunu di limaria mati, kil ku pistal i ka na pagal. Si i pistal pa diñeru, ki diñeru ki paga i justa.

Leis di sosiedadi

¹⁶ “Si un omi ngana un bajuda ku ka ten kumprumis, i dita ku el, i ten ku paga doti di kasamenti. Ki bajuda i na sedu si minjer,

¹⁷ ma si pape di bajuda nega pa bajuda kasa, ki omi ten ku paga kuantia di diñeru ku justa ku ki doti.

¹⁸ “Minjer ku ta fasi futis ka na disadu bibu.

¹⁹ “Tudu kil ku dita ku limaria ten ku matadu.

²⁰ “Kil ku ronia iran, i ka sakrifika son pa SIÑOR, i ta kabadu ku el.

²¹ “Ka bo maltrata ospri, nin ka bo kalkal, pabia abos bo seduba ospris na tera di Ejitu.

²² “Ka bo maltrata viuva nin orfan.

²³ Si bo na maltrata elis, e bin coman, ami N na obi se gritus.

²⁴ N na paña raiba, N na mata bos ku spada. Bo minjeris na sedu viuvas, bo fijus na sedu orfans.

²⁵ “Si bu pista diñeru pa un koitadi na metadi di ña pobu, ka bu fasi suma algin ku ta pista diñeru pa juru.

²⁶ Si bu toma panu di bu kumpañer suma i mpiñau el, tornal el antis di sol kai,

²⁷ pabia ke ki na dita nel? I ki panu son ki ta kubri kurpu ku el. Si i coman, N na obil, pabia ami i algin ku ta ten pena.

²⁸ “Ka bu fala mal di juisis, nin ka bu koba ŝef di pobu mal.

²⁹ “Ka bu tarda pa dan purmeru parti di bu kebur, suma miju o biñu. Bu na tisi bu purmeru fiju pa mi.

³⁰ Asin ku bu na fasi ku bu bakas ku karnelis. E na sta ku se mame seti dia; na oitavu dia bu ta tisin elis.

³¹ “Bo na sedu jinti puru pa mi. Ka bo kume karni ku limaria brabu mata na matu; bo botal pa kacuris.