Saida 21 - BIBLIA - traduson antigu in Krioulo

Regras aserka di katibus ebreu

¹ “Es i leis ku bu na pui se dianti:

² Si bu kumpra un katibu ebreu, i na tarbaja pa bo seis anu, ma na setimu anu i na largadu sin i ka paga nada.

³ Si i bin pa bo el son, el son ku na sai, ma si i seduba omi kasadu, i na sai ku si minjer.

⁴ Si si dunu dalba minjer, kila padi ku el fijus macu o femia, minjer ku si fijus e na sedu pa si dunu; omi i na sai el son.

⁵ “Ma si ki katibu diklara kuma el, i ama si dunu, ku si minjer ku si fijus, i fala i ka misti sai,

⁶ si dunu ta lebal pa juisis, i ta cigantal pa porta o aru di porta, i ta fural oreja ku guja gros. Asin i ta sedu di sil pa sempri.

⁷ “Si algin bindi si fiju femia suma katibu, kila ka na largadu suma macu.

⁸ Si si dunu kumpralba pa bin kasa ku el, i ka bin gosta del, i ka kasa ku el, i ten ku disa si pape kumpral mas. I ka pudi bindil pa jinti di utru pobu, pabia i ka tratal diritu.

⁹ Si i kumpral pa da si fiju kasamenti, i ten ku tratal suma si propi fiju femia.

¹⁰ Si i bin buri utru minjer, i ka pudi menusa kumida di ki purmeru, nin ropa, nin si diritus di kasamenti.

¹¹ Si i ka kumpri e tris kusa pa minjer, i ten ku largal, sin i ka paga nada.

Leis aserka di kilis ku ta fasi mal pa utru jinti

¹² “Kin ku suta un algin, i matal, el tambi i na matadu.

¹³ Si i ka fasil pa diskarna, ma i sedu un asidenti ku Deus pirmiti, i ta kuri pa lugar ku N na kuji,

¹⁴ ma si algin pui sintidu pa ngana si kumpañer, i matal, nin si i kuri pa ña altar, i na tiradu nel pa i matadu.

¹⁵ “Algin ku suta si pape o mame i ten ku matadu.

¹⁶ “Si algin furta omi, i bindil o i tenel inda, i ten ku matadu.

¹⁷ “Algin ku maldisua si pape o si mame i ten ku matadu.

¹⁸ “Si omis geria tok un da utru ku pedra o i dal suku, si kila ka muri, ma i ten ku fika na kama,

¹⁹ si i torna lanta tok i sai fora, i yanda ku po, kil ku sutal ka na kastigadu, ma i ten ku pagal ki tempu ki pirdi; i na judal tok i kaba san.

²⁰ “Si algin toma po i suta si katibu macu o femia, i matal na ki ora, i ten ku kastigadu.

²¹ Ma si i ka muri pa un o dus dia, si dunu ka na kastigadu, pabia ki katibu i di sil.

²² “Si utru omis na geria, e molosta un minjer preñada tok i pirdi si fiju, ma minjer ka molosta ciu, kil ku majal ten ku multadu konformi kil ku omi di ki minjer pidi; i na paga dianti di tribunal.

²³ Si minjer molosta risu, kastigu na sedu vida pa vida,

²⁴ uju pa uju, dinti pa dinti, mon pa mon, pe pa pe,

²⁵ kemansa pa kemansa, molostu pa molostu, suti pa suti.

²⁶ “Si algin suta si katibu macu o femia na uju, i danal, i ta disal pa i bai libri pabia di si uju.

²⁷ Si i suta si katibu macu o femia, i tiral dinti, i ta disal pa i bai libri pabia di si dinti.

²⁸ “Si un turu fidi un omi o minjer ku cifri tok i muri, ki turu na sutadu ku pedra; si karni ka na kumedu, ma si dunu ka na kastigadu,

²⁹ ma si ki turu ta fidi jinti, si dunu sibi diritu ma i ka maral, turu bin mata omi o minjer, i na sutadu ku pedra; tambi si dunu na matadu.

³⁰ Si dunu bin pudu pa i paga pa salba si vida, i na paga tudu ki pididu.

³¹ Si turu bin fidi fiju macu o femia, i ten ku fasidu konformi e lei.

³² Si ki turu bin fidi katibu macu o femia, si dunu na paga dunu di katibu trinta mueda di prata; ki turu na matadu ku pedra.

³³ “Si algin yabri fonti, o i koba un koba, i ka kubril, i bin kai un turu o buru na ki koba,

³⁴ dunu di koba na paga dunu di limaria diñeru, ma i na toma kadaver.

³⁵ “Si turu di un algin molosta turu di si kumpañer tok i muri, e na bindi ki bibu, e rapati diñeru na metadi; tambi e na rapati karni di ki mortu na metadi,

³⁶ ma si i sibidu kuma ki turu ta fidi, si dunu ka maral, i ten ku paga, turu pa turu; ki mortu ta sedu di sil.