Saida 20 - BIBLIA - traduson antigu in Krioulo

Des mandamentu

¹ Deus fala tudu e palabras:

² “Ami i SIÑOR bu Deus ku tirau di Ejitu, ki kau di katiberasku.

³ “Ka bu tene utru deusis fora di mi.

⁴ “Ka bu labra imaẑen pa bo, ku tene forma di kusa ku sta la riba na seu, nin li na tera, nin na yagu bas di con.

⁵ Ka bu mpina pa elis, nin ka bu adora elis, pabia ami i SIÑOR bu Deus, ku ta ten siumi. Kilis ku ta odian, N ta kastiga se maldadi riba di se fijus, netus, ku bisnetus,

⁶ ma N ta mostra ña bondadi pa milyaris di kilis ku aman, e obdisi ña mandamentus.

⁷ “Ka bu coma nomi di SIÑOR bu Deus na nada, pabia algin ku fasi asin, SIÑOR ka na ojal suma kin ku ka ten kulpa.

⁸ “Lembra di dia di diskansu, bu pul aparti.

⁹ Bu tene seis dia pa tarbaja, pa fasi tudu ku bu ten ku fasi,

¹⁰ ma setimu dia i dia di diskansu pa SIÑOR bu Deus. Ka bu fasi nin un tarbaju, nin abo nin bu fiju macu o femia, nin bu katibu macu o femia, nin bu limaria, ku fadi bu ospri ku sta na bu kasa,

¹¹ pabia na seis dia SIÑOR kumpu seu, tera ku mar, ku tudu ku sta nelis, ma i diskansa na setimu dia. Asin SIÑOR bensua dia di diskansu, i pul aparti.

¹² “Rispita bu pape ku bu mame, pa bu pudi tene manga di anu na tera ku SIÑOR bu Deus na dau.

¹³ “Ka bu mata.

¹⁴ “Ka bu dita ku algin ku bu ka kasa ku el.

¹⁵ “Ka bu furta.

¹⁶ “Ka bu lantanda falsu tustumuñu pa bu kumpañer.

¹⁷ “Ka bu kubisa kasa di bu kumpañer, nin ka bu kubisa si minjer, si katibu macu o femia, si turu, si buru, nin nada di bu kumpañer.”

Pobu sinti medu

¹⁸ Tudu pobu oja relampagu, e obi turbada ku baruju di korneta ku na toka, e oja monti na fuma, e tirmi ku medu, e rakua, e bai fika lunju.

¹⁹ E fala Moisés: “Abo bu pudi papia ku nos; no na obi; ma pa ka Deus papia ku nos, pa ka no bin muri.”

²⁰ Moisés fala pobu: “Ka bo medi; Deus bin pa proba bos, pa bo pudi kontinua ten rispitu pa el, pa bo ka peka.”

²¹ Ma pobu fika sikidu di lunju. Moisés ciga pertu di ki nuven sukuru nunde ku Deus staba nel.

Leis aserka di altar

²² SIÑOR manda Moisés pa i fala fijus di Israel: “Abos bo oja kuma ku N papia ku bos di seu.

²³ Ka bo fasi utru deusis fora di mi. Ka bo kumpu deusis di prata nin di uru pa bos.

²⁴ “Kumpun un altar di lama; riba del bu na da bu ofertas kemadu, ofertas di pas, bu karnelis ku bakas. Na tudu kau ku N kuji pa bu fasin sirmonia pa lembra di ña nomi, N na bin pa bo, N na bensuau.

²⁵ Si bu kumpun un altar di pedra, ka bu fasil ku pedras labradu. Si bu usa furmon nel, i ta oja i ka sedu ja sagradu.

²⁶ Ka bu subi na ña altar di skada, pa bu kurpu ka mostradu dianti di jinti.