Saida 11 - BIBLIA - traduson antigu in Krioulo

Praga di mortu riba di purmeru fijus

¹ SIÑOR fala Moisés: “N na manda mas un praga pa Faraó ku tudu si jinti; dipus i na disa bos bai. Na ki ora ki na larga bos, i na ten dipresa pa serka bos di li.

² Konta pobu di Israel, kada omi pa i pidi si visiñu macu, kada minjer tambi pa i pidi si visiñu femia, kusas di prata ku di uru.”

³ (SIÑOR pui ejipsius pa e mostra fabur pa pobu di Israel. Moisés propi i tenba garandi rispitu dianti di ŝefis di Faraó ku di pobu.)

⁴ Moisés fala rei: “Asin ku SIÑOR fala: ‘Me-noti N na pasa na metadi di Ejitu.

⁵ Tudu purmeru fiju na tera di Ejitu na muri, desdi purmeru fiju di Faraó ku ta sinta ku el na si tronu, te purmeru fiju di katibu ku na pila foriña di miju, ku tudu purmeru fiju di limarias.

⁶ I na bin ten garandi gritu na tudu tera di Ejitu, ku nunka ka ten suma el, nin i ka na bin ten,

⁷ ma na metadi di israelitas nin un kacur ka na ladra kontra kualker omi nin limaria.’ Asin bo na sibi kuma SIÑOR ta diferensia ejipsius ku israelitas.

⁸ Na ki ora tudu bu ŝefis na bin pa mi, e na mpina ña dianti, e fala: ‘Sai, abo ku tudu pobu ku ta sigiu.’ Dipus di kila, N na sai.” Asin, ku garandi raiba, Moisés sai dianti di Faraó.

⁹ SIÑOR falaba ja Moisés: “Faraó ka na obi bos; asin ña milagris na buri na tera di Ejitu.”

¹⁰ Moisés ku Aron e fasi tudu ki milagris dianti di Faraó, ma SIÑOR ndurusi korson di Faraó; i nega disa fijus di Israel pa e sai na si tera.