Saida 1 - BIBLIA - traduson antigu in Krioulo

Jorson di Jakó na Ejitu

¹ Esis i nomis di fijus di Jakó, ku sedu Israel, ku bai pa Ejitu ku el, kada kin ku si familia:

² Ruben, Simeon, Levi ku Judá;

³ Isakar, Zebulon ku Benjamin;

⁴ Dan ku Naftali; Gad ku Aser.

⁵ Tudu jorson di Jakó e seduba setenta. José staba ja na Ejitu.

⁶ Dipus di José muri, ku tudu si ermons ku tudu si familia di ki tempu,

⁷ fijus di Israel padi, e buri tok e ciu dimas; e torna forti, tok e inci tera.

⁸ Un nobu rei ku ka sibi nada di José i bin lanta pa manda riba di Ejitu.

⁹ I fala si pobu: “E jinti di Israel e ciu tok e mas ten forsa di ki nos.

¹⁰ Bo bin, no fasi manera mas jiru pa e ka buri, pabia i pudi bin ten gera, e pudi junta ku inimigu, e geria kontra nos, e toma konta di tera.”

¹¹ E pui kapatasis, ku sedu ŝefis di tarbaju, riba delis pa kastiga elis ku tarbaju forsadu. Asin pobu di Israel e bin kumpu prasas, Piton ku Ramasés, pa guarda rikesas di Faraó.

¹² Ma konformi e na kastiga elis, e mas na buri, tok e na inci tera. Asin ejipsius mas sinti ameasadu delis,

¹³ e pui elis tarbaju duru.

¹⁴ E fasi elis kasabi na vida ku duresa na tarbaju di masa lama ku forma tiẑolus, ku tudu tarbaju di labur. Ku tudu se tarbaju e mas na trataduba ku kasabi.

Parteras nega mata mininus

¹⁵ Rei di Ejitu papia ku Sifrá ku Puá, ku seduba parteras di ebreus,

¹⁶ i fala elis: “Ora ku bo na juda na partu di minjeris ebreu, si mininu i macu, bo ta matal; ma si i sedu femia, ka bo matal.”

¹⁷ Ma parteras tenba medu di Deus, e ka fasi suma ku rei di Ejitu fala elis. Asin e guarda vida di mininus.

¹⁸ Rei bin coma elis, i punta elis: “Ke ku manda bo guarda vida di mininus?”

¹⁹ Parteras fala Faraó: “Minjeris ebreu e ka sedu suma minjeris di Ejitu, pabia e ten forsa, e ta padi se fijus antis di no bai juda elis.”

²⁰ Asin ku pobu bin aumenta, e torna forti dimas. Deus fasi bondadi pa ki parteras,

²¹ i da elis familia pabia e tenba rispitu pa Deus.

²² Dipus Faraó da ordi pa tudu si pobu, i fala: “Tudu rapas ku padidu, bo botal na riu, ma si i femia, bo ta disal ku vida.”