Ruti 2 - BIBLIA - traduson antigu in Krioulo

Nkontru di Ruti ku Boaz

¹ Noemi teneba un parenti di ladu di si omi, di familia di Elimelek, omi riku, di puder; si nomi i Boaz.

² Un dia, ki moabita Ruti fala Noemi: “N misti bai jubi si N ta oja algin ku na disan kuji garan tras di kebraduris na si lugar.” Noemi falal: “Bai, ña fiju.”

³ Ruti ciga na un lugar, i na kuji garan tras di kebraduris. Pa sorti ki lugar ki na kujiba nel i seduba di Boaz, di familia di Elimelek.

⁴ Boaz ciga di Belen, i fala kebraduris: “SIÑOR ta sta ku bos.” E ruspundil: “SIÑOR ta bensuau.”

⁵ Dipus Boaz punta si rapas ku tenba konta di kebraduris: “Kin ku tene ki bajuda?”

⁶ Rapas ruspundil: “I ki bajuda moabita ku bin ku Noemi di tera di Moab.

⁷ I pidin pa N disal pa i bai tras di kebraduris pa i ba ta kuji garan ki oja. I bin disna di parmaña, i pega te gosi; i diskansa son un bokadiñu na baraka.”

⁸ Boaz fala Ruti: “Ña fiju, sukutan. Ka bu bai kuji na utru lugar, nin ka bu sai li, ma bu ta fika juntu ku ña bajudas.

⁹ Ba ta jubi lugar ke na kebra nel, bu bai se tras. N da rapasis ordi pa ka e toka na bo. Si bu tene sedi, bu ta bai pa puti, bu bibi yagu ku rapasis kata.”

¹⁰ Ruti mpina ku rostu na con, i puntal: “Pabia di ke ku N oja fabur dianti di Ñu, manera ku Ñu nota pa mi, ku sedu stranjeru?”

¹¹ Boaz ruspundi i falal: “N obi tudu kusa ku bu fasi pa bu sogra dipus di mortu di bu omi; bu disa bu pape ku bu mame, ku tera nunde ku bu padidu, bu bin pa pobu ku bu ka kunsiba.

¹² SIÑOR na pagau ke ku bu fasi. SIÑOR Deus di Israel, kil ku bu bin buska kau di sukundi bas di si asa, i na pagau tudu ku bu mersi.”

¹³ Ruti falal: “I bon pa N kontinua oja fabur dianti di Ñu, pabia Ñu konsolan, Ñu papia diritu ku mi, mesmu ku N ka sedu igual ku un di kriadus di Ñu.”

¹⁴ Na ora di kume, Boaz falal: “Ciga li, bu toma pon, bu mojal na vinagri.” Ruti sinta ku kebraduris; Boaz dal garan iladu; i kume tok i farta, i sobra utru.

¹⁵ I lanta pa bai kuji mas. Boaz da si rapasis ordi i fala elis: “Bo disal i kuji, nin si i na metadi di maraduras; ka bo ŝatial.

¹⁶ Bo pudi disa utru pes kai pa i pudi kuji elis; ka bo raprindil.”

¹⁷ Ruti fika i na kuji na ki lugar te di tardi; i masa kil ki oja; i seduba kuas vinti litru di sevada.

¹⁸ I lebal pa prasa; si sogra oja kil ki kuji. Ruti tira tambi ki kumida ki sobraba oca ki farta, i da si sogra el.

¹⁹ Si sogra puntal: “Nunde ku bu kuji aos? Na lugar di kin ku bu tarbaja? Ki algin ku nota pa bo i na bensuadu.” Ruti splika si sogra kin ki tarbaja ku el, i falal: “Nomi di omi ku N tarbaja ku el aos i Boaz.”

²⁰ Noemi fala Ruti: “SIÑOR na bensual, pabia SIÑOR ka para fasi si bondadi pa bibus ku mortus.” I fala: “Ki omi i no parenti tokadu. I un di kilis ku dibi di sakuranu.”

²¹ Ruti falal: “Ki omi falan tambi pa N kontinua kuji juntu ku si tarbajaduris te na kabantada di kebur.”

²² Noemi fala si netu Ruti: “Ña fiju, i minjor pa bu sta juntu ku si bajudas, pabia na utru lugar bu pudi molostadu.”

²³ Asin Ruti fika i na kuji ku bajudas di Boaz, tok kebur di sevada ku trigu kaba. I kontinua ku si sogra.