Ruti 1 - BIBLIA - traduson antigu in Krioulo

Noemi ku Ruti

¹ Na tempu di ŝefis, i tenba fomi na tera. Pabia di kila, un omi di Belen di Judá sai pa bai mora na tera di Moab, el ku si minjer ku se dus fiju.

² Nomi di ki omi i Elimelek; nomi di minjer i Noemi; nomi di se dus fiju i Malon ku Kilion. E seduba efrateus di Belen di Judá. E ciga na tera di Moab, e bai fika la.

³ Elimelek, omi di Noemi, muri. Noemi fika ku si dus fiju.

⁴ Elis e ranja minjeris di Moab; nomi di un son i Orfa, di ki utru i Ruti. Dipus de fika la kuas des anu,

⁵ Malon ku Kilion muri tambi, tudu dus. Asin Noemi fika el son, sin si fijus nin si omi.

⁶ Un dia i lanta, ku viuvas di si dus fiju, pa riba pa si tera, pabia, la na Moab, i obiba kuma SIÑOR bin juda si pobu, i da elis kumida.

⁷ Asin i sai na kau ki staba nel, ku viuvas di si dus fiju, e pega na kamiñu pa riba pa tera di Judá.

⁸ Noemi fala elis: “Bo riba, kada kin pa kasa di si mame. SIÑOR na sedu bon pa bos, suma ku bo seduba bon pa falsidus, pa mi tambi.

⁹ SIÑOR na juda bos pa bo oja diskansu, kada kin na kasa di si omi.” I beẑa elis; e yalsa fála, e cora;

¹⁰ e falal: “No na bai ku bo pa bu pobu.”

¹¹ Noemi fala: “Bo riba, ña fijus. Pabia di ke ku bo na bai ku mi? Nta N pudi padi mas fijus ku na bin kasa ku bos?

¹² Bo riba, ña fijus; bo bai, pabia N beju ja pa tene omi. Nin ku N ten speransa, o nin ku N tene omi aos di noti, N bin padi fijus,

¹³ bo na pera elis me, tok e bin garandi? Bo na guarda bo kurpu pa elis, sin tene utru omi? Nau, ña fijus, i mas kasabi pa mi di ki pa bos, pabia mon di SIÑOR sta kontra mi.”

¹⁴ E yalsa fála, e torna cora mas. Orfa beẑa si sogra, ma Ruti ka seta largal.

¹⁵ Noemi falal: “Ala bu konkuñada riba pa si pobu ku si deusis. Abo tambi, riba si tras.”

¹⁶ Ruti falal: “Ka bu ngodan pa N riba, N fika lunju di bo. Nunde ku bu bai, la ku N na bai; nunde ku bu mora, la ku N na mora. Bu pobu na sedu ña pobu; bu Deus na sedu ña Deus.

¹⁷ Nunde ku bu muri, la ku N na muri, la ku N na nteradu nel. SIÑOR na kastigan risu si utru kusa rapatinu ku ka sedu mortu.”

¹⁸ Oca Noemi oja kuma i na ntema pa bai ku el, i para ngodal pa i riba.

¹⁹ Asin e bai juntu tok e ciga na Belen. Oca ke na yentra la, tudu jinti di prasa fika dimiradu pabia delis. Minjeris fika e na punta: “Nta es i ka Noemi?”

²⁰ I fala elis: “Ka bo coman Noemi, ma bo coman Mara, pabia Deus ku ten tudu puder i dan kasabi garandi na ña vida.

²¹ Oca ku N na sai li, N staba riku, ma SIÑOR fasin pa N riba sin nada. Pabia di ke ku bo na coman Noemi? SIÑOR kondenan; Deus ku ten tudu puder kastigan ciu.”

²² Asin Noemi riba di tera di Moab, ku Ruti, si netu moabita. E ciga na Belen na kumsada di kebur di sevada.