Romanus 9 - BIBLIA - traduson antigu in Krioulo

Deus ku si pobu

¹ N na konta bardadi. Ami i di Kristu, N ka ta konta mintida. Ña konsiensia, bas di puder di Spiritu Santu, i na konfirma ña palabra,

² kuma N ten garandi tristesa ku dur ku ka ta kaba na ña korson,

³ tok N ta tenba vontadi di sta bas di praga, separadu di Kristu, pa amor di ña ermons ku sedu ña parentis di sangi.

⁴ I elis ku sedu israelitas; Deus fasi elis si fijus, i rapati gloria ku elis, i fasi kontratu ku elis, i da elis lei; i elis ku ten sirmonia di bardadi, ku purmesas.

⁵ I elis ku sai na jorson di papes antigu. Na ladu di familia, Kristu sai na ki jorson. El i sta riba di tudu, i sedu Deus ku dibi di ngabadu pa sempri! Amen.

⁶ I ka suma palabra di Deus maina. I ka tudu kilis ki di sangi di Israel ku sedu israelita,

⁷ nin i ka tudu ki fiju di Abraon pabia i sedu di si jorson, ma Deus fala Abraon: “I fijus di Isak ku na comadu bu jorson.”

⁸ Ke ku N misti fala: i ka fijus di sangi di Abraon ku ta sedu fijus di Deus, ma i fijus ku Deus falaba del ku kontadu suma si jorson.

⁹ Purmesa ku Deus dalba i es: “Na tempu markadu N na bin; Sara na tene un fiju.”

¹⁰ I ka son es, ma Rebeka tambi i teneba bariga di un omi ku sedu Isak no pape.

^11-12 Deus falal kuma mas garandi i na sirbi mas pikininu. I fala es antis di mininus padidu, oca e ka fasi nin ben nin mal, pa planu di Deus pudi sedu firmi; i ka pabia di kusas ku mininus fasi, ma i suma ku Deus kuji, i coma.

¹³ Skritura fala: “N ama Jakó ma N pui Esaú aparti.”

¹⁴ Ke ku no na fala gora? Nta Deus i injustu? Nau, i ka injustu.

¹⁵ I fala Moisés: “N ta ten miserikordia di kil ku N misti ten; N ta ten pena di kil ku N misti ten.”

¹⁶ I ka ta sedu konformi kil ku omi misti, o ki fasi, ma i konformi miserikordia di Deus.

¹⁷ Na Skritura Deus fala Faraó: “E ku manda N lantandau, pa N mostra ña puder na bo, pa ña nomi kontadu na tudu mundu.”

¹⁸ Asin Deus ta ten pena di kil ki misti; si i misti i ta fasi algin korson duru.

Kastigu ku miserikordia di Deus

¹⁹ Bu pudi puntan: “Ke ku manda Deus na oja inda kulpa na omi? Kin ku pudi nega si vontadi?”

²⁰ Abo i kin, omi, ku na diskuti ku Deus? Nta puti ta punta kil ku kumpul: “Pabia di ke ku bu kumpun de manera?”

²¹ O kumpudur di puti ka ten diritu pa toma un bokadu di lama pa i fasi un puti di mas balur, i fasi utru tambi ku menus balur?

²² Ke ku no ten ku fala si Deus misti mostra si raiba, i misti tambi pa jinti kunsi si puder? El i sufri ku manga di pasensa kilis ku mersiba kastigu, ku na bai pa pirdison.

²³ I misti tambi mostra rikesa di si gloria na nos ki ten pena del, kilis ki purpara disna pa risibi e gloria.

²⁴ Deus comanu tambi, i ka son na metadi di judeus, ma tambi na metadi di jintius.

²⁵ I el ku Deus fala na libru di Oseias: “Kilis ku ka seduba ña pobu, N na coma elis ‘ña pobu.’ Rasa ku N ka kiriba, N na comal ‘ña kiridu.’ ”

²⁶ I fala tambi: “Na ki kau ki faladuba: ‘Abos i ka ña pobu,’ la ke na comadu: ‘fijus di Deus bibu.’ ”

²⁷ Oca Isaias na konta di Israel, i yalsa vos, i fala: “Nin ku pobu di Israel sedu ciu suma reia di mar, ma un bokadu son ku na sedu salbu,

²⁸ pabia Siñor i ka na tarda fasi si justisa kompletu riba di tudu mundu.”

²⁹ I suma ku Isaias tarda fala: “Si Siñor ku ten tudu puder ka disanuba jorson, no na bidaba suma Sodoma, no na parsiba ku Gomora.”

³⁰ Ke ku no na fala gora? No na fala kuma jintius ku ka na buskaba sedu justu, e bin ojadu justu pabia di se fe,

³¹ ma pobu di Israel, ku pega tras di lei pa e pudi ojadu justu, e ka yangasal.

³² Pabia di ke? Pabia e ka buskal ku fe, ma e na lida pa buskal ku kusas ke ta fasi. E mbaransa na “pedra di da tapada”,

³³ suma ki sta skritu: “Bo oja, N na pui na Sion un pedra di da tapada, un roca ku na pui elis kai. Kin ku fia nel ka na fika ku borgoña.”