Romanus 8 - BIBLIA - traduson antigu in Krioulo

Vida na Spiritu

¹ I ka ten kondenason pa kilis ku liga ja ku Kristu Jesus, [ku ka ta yanda konformi vontadi di se kurpu, ma konformi Spiritu,]

² pabia puder di Spiritu ku ta tisi vida juntu ku Kristu Jesus libran di puder di pekadu ku di mortu.

³ Deus fasi kil ku lei ka pudiba fasi, di manera ku no naturesa fraksi lei: i manda si Fiju ku kurpu suma no kurpu di pekadu, pa i sedu sakrifisiu pa pekadu, tambi pa i kondena pekadu na no naturesa,

⁴ pa mandamentu justu di lei pudi kumpridu na nos, ku ka na yanda na vontadi di no kurpu, ma na vontadi di Spiritu.

⁵ Kilis ku na yanda na se naturesa, se pensamentu ta bai pa kusas di se naturesa, ma kilis ku na yanda na Spiritu, se pensamentu ta bai pa kusas di Spiritu.

⁶ Si pensamentu bai pa kusas di naturesa, i ta tisi mortu, ma si i bai pa kusas di Spiritu, i ta tisi vida ku diskansu.

⁷ Pensamentu di no naturesa i inimisadi kontra Deus; i ka ta obdisi lei di Deus. Na bardadi i ka pudi.

⁸ Deus ka pudi kontenti ku kilis ku na yanda konformi se naturesa.

⁹ Abos, bo ka na yanda ja na vontadi di bo kurpu, ma na vontadi di Spiritu, si na bardadi Spiritu di Deus sta na bos. Kin ku ka tene Spiritu di Kristu, si dunu i ka del.

¹⁰ Si Kristu mora na bos, nin ku kurpu sta mortu pabia di pekadu, ma spiritu sta bibu, manera ku bo ojadu justu dianti di Deus.

¹¹ Si Spiritu di kil ku lantanda Jesus di mortu sta na bos, ki algin ku lantanda Kristu di mortu tambi i na pui vida na bo kurpu mortal, pabia di si Spiritu ku sta na bos.

¹² Asin ermons, no ten obrigason, ma i ka ku no naturesa, pa no yanda suma ku no kurpu misti.

¹³ Si bo yanda suma ku bo kurpu misti, bo na muri, ma si, na puder di Spiritu, bo mata kustumus di bo kurpu, bo ta vivi.

¹⁴ Tudu kilis ku Spiritu di Deus na gia, elis i fijus di Deus.

¹⁵ Spiritu ku bo risibi i ka ta fasi bos katibu pa bo pudi torna ten medu, ma bo risibi Spiritu ku fasi bos fijus, ku ta pui pa no coma Deus, no falal: “Deus no Pape.”

¹⁶ E mesmu Spiritu ta junta ku no spiritu pa diklara kuma no sedu fijus di Deus.

¹⁷ Suma no sedu fijus, no na yarda rikesa di Deus. No na risibil juntu ku Kristu, si kontra no na sufri ku el pa no pudi tambi ten parti na si gloria.

Gloria di futuru

¹⁸ Ami N ten sertesa kuma, sufrimentu de tempu, no ka pudi parsintil ku gloria ku na bin mostradu na nos.

¹⁹ Tudu ku Deus kumpu ta faima pa ki dia ku Deus na mostra kilis ku sedu si fijus,

²⁰ pabia kusas ku Deus kumpu pirdi tudu se balur, e ka sedu nada. I ka pa se vontadi, ma i vontadi di kil ku baŝa elis,

²¹ na speransa di kuma, un dia, e kusas ki kumpu na libradu di katiberasku di podrisa, e na risibi liberdadi gloriosu di fijus di Deus.

²² No sibi kuma, te gosi, tudu ku Deus kumpu, i junta, i na jimi ku dur suma dur di partu.

²³ I ka el son, ma anos tambi ku risibi purmeru pursenti di Deus, ku sedu si Spiritu, no na jimi dentru di nos, suma ku no na pera pa Deus fasinu si fijus, pa i libra no kurpu.

²⁴ No sta salbu pabia di speransa. Si no oja kil ku no na pera, i ka speransa ja, pabia kusa ku algin na oja, kuma ki na peral?

²⁵ Ma si no na pera kil ku no ka oja, no ta peral ku pasensa.

²⁶ Di mesmu manera tambi Spiritu ta judanu na no frakesa, pabia no ka sibi manera diritu di pidi, ma Spiritu propi i ta pidi Deus pa nos ku jimidu ku ka pudi kontadu ku palabras.

²⁷ Kil ku ta rabista korson i sibi kal ki pensamentu di Spiritu. I el, Spiritu, ku ta pidi pa krentis konformi vontadi di Deus.

²⁸ No sibi kuma Deus ta usa tudu kusa pa ben di kilis ku amal, kilis ki coma suma ki distina.

²⁹ Kilis ki kunsi disna di kumsada, tambi i distinaba ja elis pa e parsi suma si Fiju, pa ki Fiju pudi sedu garandi na metadi di manga di ermon.

³⁰ Kilis ki distinaba ja, tambi i coma elis. Kilis ki coma, tambi i fasi elis justu. Kilis ki fasi justu, tambi i da elis si gloria.

Kantiga di vitoria: Deus i pa nos

³¹ Dianti de kusas, ke ku no na fala gora? Si Deus i pa nos, kin ku na sta kontra nos?

³² Kil ku ka tuji nin propi si Fiju, ma i ntregal pabia di nos tudu, kuma tambi ki ka na bin patinu tudu kusas juntu ku el?

³³ Kin ku na akusa kilis ku Deus kuji? I Deus ku na fasi elis justu.

³⁴ Kin ku na kondena elis? Kristu Jesus, el ku muri, o minjor, el ku lantandadu na metadi di mortus, el ku sta na mon direita di Deus; tambi i na roga pa nos.

³⁵ Kin ku na rapatinu di amor di Kristu? Kansera? o kasabi? o pirsigison? o fomi? o falta di ropa? o pirigu? o spada?

³⁶ Suma ki sta skritu: “Pa amor di bo no sta na pirigu di mortu tudu dia; no na parsintidu suma karnel ku na bai matadu.”

³⁷ Ma na tudu e kusas, no na sedu mas di ki vensiduris pabia di kil ku amanu,

³⁸ pabia N fia kuma, nin mortu, nin vida, nin anju, nin otridadi, nin puder di dimoniu, nin e tempu li, nin tempu futuru,

³⁹ nin altura, nin fundura, nin utru kriatura, ka na pudi rapatinu di amor di Deus ku sta na Kristu Jesus no Siñor.