Romanus 6 - BIBLIA - traduson antigu in Krioulo

Mortu pa pekadu, bibu pa Kristu

¹ Nta ke ku no na fala? No na kontinua na pekadu pa fabur di Deus pudi buri?

² Nunka! Anos ku muri ja pa pekadu, kuma ku no na kontinua nel?

³ Nta bo ka sibi kuma, anos tudu ku batisadu na Kristu Jesus, no batisadu tambi na si mortu?

⁴ Oca no batisadu, no nteradu ku el na mortu, pa no pudi yanda na nobu vida, suma ku puder gloriosu di Pape lantanda Kristu di mortu.

⁵ Si no junta ku el na parsensa di si mortu, asin tambi no na sedu na parsensa di si resureison.

⁶ No sibi kuma ki algin beju ku staba dentru di nos i krusifikadu ku Kristu, pa naturesa di peka pajigadu, pa ka no kontinua sirbi pekadu.

⁷ Kil ku muri i sta ja libri di pekadu.

⁸ Si no muri ku Kristu, no fia tambi kuma no na vivi ku el.

⁹ No sibi kuma, manera ku Kristu lanta di mortu, i ka na muri mas. Mortu ka na ten mas forsa riba del.

¹⁰ Manera ki muri, i muri janan pa pekadu. Manera ki na vivi, i na vivi pa Deus.

¹¹ Asin tambi abos, bo fasi di konta kuma bo sta mortu pa pekadu, ma bo sta bibu pa Deus, juntu ku Kristu Jesus.

¹² Pekadu ka dibi di manda mas na bo kurpu mortal, pa bo torna sigi si diseẑu mau.

¹³ Ka bo ntrega membrus di bo kurpu pa pekadu, suma feramentu di mal, ma bo ntrega bo kurpu pa Deus, suma bibus ku tiradu na metadi di mortus. Bo ntrega bo membrus pa Deus suma feramentu di fasi ben.

¹⁴ Pekadu ka na ten forsa riba di bos, suma bo ka sta bas di lei, ma bo sta bas di fabur di Deus.

¹⁵ Ma i ke? No ten ku peka suma no ka sta bas di lei ma bas di fabur di Deus? Nunka!

¹⁶ Nta bo ka sibi kuma, ora ku bo ntrega bo kurpu suma katibu pa sirbi algin, bo sedu katibu di kil ku bo na sirbi? Bo sedu katibu di pekadu ku ta leba bos pa mortu, o bo sedu katibu pa obdisi pa fasi bos justu.

¹⁷ Deus obrigadu! Abos ku seduba katibu di pekadu, bo bin seta ku tudu korson kusas ku sta na nsinamentu ku bo ntregadu nel.

¹⁸ Bo libradu di pekadu; bo fasidu katibu pa fasi ben.

¹⁹ Pabia di frakesa di bo naturesa, N na fala palabra ku omi ta ntindi. Purmeru ba, bo pui bo membrus na katiberasku di susidadi pa fasi mal riba di mal. Asin tambi gosi bo ten ku ntrega bo membrus suma katibus di ben pa fasi kusas diritu, pa bo pudi sedu santu.

²⁰ Oca ku bo seduba katibu di pekadu, bo ka obrigaduba fasi ben.

²¹ Kal rusultadu ku bo tenba di ki kusas ku gosi bo ta burguñu ku el? Fin di ki kusas i mortu.

²² Ma gosi, bo sta libri di pekadu, bo fasidu katibus di Deus. Frutu ku bo tene gosi na leba bos pa puresa, dipus pa vida ku ka ta kaba.

²³ Pagamentu di pekadu i mortu, ma kil ku Deus ta danu di grasa i vida ku ka ta kaba, pabia di Kristu Jesus no Siñor.