Romanus 5 - BIBLIA - traduson antigu in Krioulo

Pas ku Deus

¹ Manera ku no ojadu justu pa fe, no ten pas ku Deus pabia di no Siñor Jesus Kristu

² ku yentrandanu, pabia di no fe, ne fabur ku no firma nel. No kontenti na speransa ku no ten di gloria di Deus.

³ I ka son kila, ma tambi no kontenti na kansera. No sibi kuma kansera ta da firmesa;

⁴ firmesa ta juda pasa proba; pasa proba ta da speransa;

⁵ speransa ka ta tisi disanimu, pabia Spiritu Santu ku no dadu i darma amor di Deus dentru di no korson.

⁶ Oca inda no sedu fraku, Kristu muri pa jinti mau na tempu propi.

⁷ I kansadu pa oja kin ku na muri pa un algin justu. I pudi sedu algin osa muri pabia di un omi bon,

⁸ ma Deus danu proba di si amor pa nos, manera ku Kristu muri pa nos ocanu inda na no pekadu.

⁹ Suma no ojadu justu pa si sangi, kuma gora ki ka na salbanu di raiba di Deus?

¹⁰ Manera ku no seduba si inimigus, Deus fasinu si amigus pabia di mortu di si Fiju. Gosi ku no sedu amigus di Deus, kuma ku no ka na sedu salbu pabia di si vida?

¹¹ I ka son es, ma no kontenti ku Deus pabia di no Siñor Jesus Kristu ku fasinu amigus di Deus.

Adon ku Kristu

¹² Pekadu yentra na mundu pabia di un omi; i tisi mortu. Asin tambi mortu pasa pa tudu jinti pabia tudu peka.

¹³ Pekadu staba na mundu antis di lei dadu, ma nunde ku lei ka ten, pekadu ka ta lebadu na konta.

¹⁴ Desdi Adon te Moisés mortu rena, te na kilis ku ka peka suma Adon ku kebra ordi di Deus. Adon i figura di kil ku tenba ku bin.

¹⁵ Pursenti ku Deus pati i ka suma ki pekadu di Adon. Manga di jinti muri pabia di pekadu di ki un omi, ma fabur di Deus i mas garandi, suma tambi pursenti ki pati manga di jinti pabia di fabur di un omi, ki Jesus Kristu.

¹⁶ Pursenti i ka juntu ku pekadu ku ki un omi fasi. Julgamentu binba, na bardadi, pabia di ki un pekadu; i tisi kondenason, ma, dipus di manga di pekadu fasidu, pursenti di Deus binba pa fasi jinti justu.

¹⁷ Pabia di pekadu di un omi, mortu bin rena pabia di ki algin, ma kil ku Deus pati i muitu mas garandi. Kilis ku risibi fabur ciu, e ojadu justu sin paga nada, e ta rena na vida pabia di un omi, ki Jesus Kristu.

¹⁸ Suma ku un pekadu tisi julgamentu riba di tudu jinti pa kondena elis, asin tambi un kusa bon ku fasidu tisi fabur pa tudu jinti pa fasi elis justu, pa da elis vida.

¹⁹ Suma ku disobdiensia di un omi leba manga di jinti pa e torna kulpadu, asin tambi obdiensia di un omi ta leba manga delis pa e torna justu.

²⁰ Lei bin pa pudi buri pekadu, ma nunde ku pekadu ciu, fabur di Deus i mas ciu,

²¹ pa e fabur pudi rena na justisa pa tisi vida ku ka ta kaba, pabia di no Siñor Jesus Kristu, na mesmu manera ku pekadu rena na mortu.