Romanus 4 - BIBLIA - traduson antigu in Krioulo

Abraon ojadu justu manera ki fia

¹ Ke ku no pudi fala kuma Abraon, no pape antigu, yangasa?

² Si Abraon ojadu justu pabia di kusas ki fasi, i pudi ngaba si kabesa, ma i ka pudi ngaba si kabesa dianti di Deus.

³ Nta ke ku Skritura fala? I fala kuma: “Abraon fia na Deus; si fiansa pui Deus ojal justu.”

⁴ Un algin ku na tarbaja, si pagamentu i ka sedu suma i patidu nan, ma i ta risibi kil ki mersi.

⁵ Kil ku ka na tarbaja, ma i fia na kil ku ta fasi omi mau justu, si fiansa ta pui Deus i ojal justu.

⁶ Davi konta mesmu kusa oca i fala kuma, sortiadu i ki omi ku Deus oja kuma i justu, sin i jubi pa si obra. I fala:

⁷ “Sortiadu i kilis ku se maldadi sta purdadu, se pekadu kubridu.

⁸ Sortiadu i ki algin ku Siñor ka pui si pekadu riba di si kabesa.”

⁹ Nta e sorti bin son pa kilis ku sirkunsidadu, o tambi pa kilis ku ka sirkunsidadu? No fala kuma Abraon fia na Deus; si fiansa pui Deus i ojal justu.

¹⁰ Kal tempu ku si fiansa kontadu suma justisa? Oca i sirkunsidadu o i ka sirkunsidadu? I ka dipus ma antis di i sirkunsidadu.

¹¹ I risibi sirkunsison suma sinal di kuma i sedu justu pabia di si fe antis di i sirkunsidadu, pa i pudi sedu pape di tudu kilis ku fia ku ka sirkunsidadu, pa elis tambi pudi ojadu justu;

¹² pa i pudi sedu tambi pape di kilis ku ka sedu son sirkunsidadu, ma tambi e na remenda fe ku no pape Abraon tenba antis di i sirkunsidadu.

¹³ Deus fala Abraon ku si jorson kuma mundu na sedu di selis. I ka daba elis e purmesa pabia Abraon kumpri lei, ma i pabia si fe pul pa i ojadu justu.

¹⁴ Si i kilis ku tene lei ku na yarda mundu, nta fe i ka nada; purmesa pirdi balur.

¹⁵ Lei ta tisi raiba, ma nunde ku lei ka ten, kebra lei ka ten tambi.

¹⁶ Asin purmesa i pabia di fe, pa i pudi dadu di grasa, pa i sedu purmesa sertu pa jorson di Abraon. I ka son pa kilis ku tene lei, ma tambi kilis ku ten fe suma Abraon, kil ku sedu pape di nos tudu.

¹⁷ Libru di Deus fala: “N fasiu pape di manga di nason.” E purmesa sta dianti di uju di kil ku Abraon fiaba nel, ku sedu Deus, kil ku ta da vida pa mortus, ku ta coma kusas ki ka ten suma ki ten.

¹⁸ Oca speransa kabal, Abraon, pabia di si fe, i tenba speransa kuma i na fasiduba pape di manga di nason, suma ki faladuba: “Asin ku bu jorson na sedu.”

¹⁹ I ka fraksi na fe, i ka jubi pa si kurpu sin forsa, manera ki tene kuas sen anu; nin i ka jubi tambi pa bejisa di Sara manera ki ka pudiba ja padi.

²⁰ I ka duvida di purmesa di Deus pa falta di fe, ma si fe tornal mas forti; i da Deus gloria.

²¹ I tenba sertesa kuma, kil ku Deus fala, i ten puder pa fasil.

²² Asin tambi, pabia de fe ki tenba, Deus ojal justu.

²³ E palabra kuma Deus ojal justu i ka sta skritu son pa el,

²⁴ ma tambi pa nos ku na ojadu justu, anos ku fia na Deus ku lantanda Jesus no Siñor di mortu.

²⁵ I ntregadu pa i pudi muri pabia di no pekadu; i lantandadu pa no pudi sedu justu.