Romanus 3 - BIBLIA - traduson antigu in Krioulo

Sorti di judeu

¹ Kal purbitu ku judeu ten? O kal ki balur di sirkunsison?

² Manga del, na tudu sintidu. Purmeru, pabia Deus fia nelis, i ntrega elis si palabra.

³ Si utrus i ka fiel, i ke gora? I ta pui Deus ka sedu fiel?

⁴ Nunka! Deus ten ku sedu di bardadi, nin ku tudu omi sedu munturus, suma ki sta skritu: “Pa bu sedu justifikadu na bu palabras; ora ku bu sedu julgadu, pa bu ngaña.”

⁵ Si manera ku no ta fasi mal i ta mas pui bondadi di Deus raparadu, ke ku no pudi fala? O Deus i injustu nan, ora ki na kastiganu ku raiba? (N na fala suma omi.)

⁶ Nunka! Si i asin, kuma ku Deus pudi julga mundu?

⁷ Si pabia di ña mintida, bardadi di Deus pudi mas parsi, pa si gloria, ke ku manda ami inda N na julgadu pa ña pekadu?

⁸ Ke ku manda no ka na fala pa no fasi mal pa i pudi bida bon? Bardadi, utrus akusanu kuma asin ku no ta fala, ma i mintida. Kondenason de jinti i justa elis!

Tudu jinti sta bas di pekadu

⁹ Nta i ke? Anos judeus no sedu minjor di ki utru jinti? Nau! No mostra ja kuma, judeus ku jintius, tudu sta bas di puder di pekadu,

¹⁰ suma ki sta skritu: “I ka ten nin un justu, nin un son.

¹¹ I ka ten kil ku ta ntindi; i ka ten kil ku na buska Deus.

¹² Tudu jinti sai na kamiñu di Deus, e pirdi balur. I ka ten kil ku na fasi ben; i ka ten nin un son.

¹³ Se boka podri suma koba di difuntu ku yabridu. Se lingua ta fala son nganu; venenu di kobra sta na se boka.

¹⁴ Se boka inci di palabra fiu i malgos.

¹⁵ Se pes ta lestu pa bai darma sangi.

¹⁶ Se kamiñu son stragu ku koitadesa.

¹⁷ E ka kunsi kamiñu di pas.

¹⁸ E ka ta rispita Deus, nin e ka ta mporta ku el.”

¹⁹ No sibi kuma tudu ku lei fala, i ta fala pa kilis ku sta bas di lei, pa tudu boka pudi kala; tudu mundu ten ku fika bas di julgamentu di Deus.

²⁰ Nin un algin ka na ojadu justu pabia di guarda lei, ma lei ta mostranu pekadu.

Manera ku Deus ta fasinu justu

²¹ Gosi Deus mostra manera ki ta fasi jinti justu; i ka pabia di lei, ma librus di lei ku di anunsiaduris e ta konta kusa del.

²² Deus ta fasi jinti ku fia na Jesus Kristu pa e sedu justu. El i ka ta fasi skuju; i pa tudu kil ku ten fe.

²³ Tudu jinti peka; e ka yangasa naturesa gloriosu di Deus.

²⁴ E ta ojadu justu sin paga nada, pabia di fabur di Deus, manera ku Kristu Jesus kaplinti elis.

²⁵ Deus dal pa i sedu sakrifisiu, pa jinti pudi fia, pa e purdadu se pekadu, pabia di si sangi. Asin Deus mostra manera ki sedu justu. Na tempu ku pasa, na si pasensa, i purda elis pekadu ke fasi,

²⁶ pa i pudi mostra si bondadi ne tempu, kuma el i justu, i ta pui kil ku fia na Jesus sedu justu.

²⁷ Nunde ku njata sta nel gora? I ka ten! Pa kal roson? Pabia di kumpri lei? Nau, ma i pabia di fe.

²⁸ No rapara na bardadi kuma jinti ta ojadu justu son pabia di fe. I ka pabia di kumpri lei.

²⁹ Nta Deus i son di judeus? I ka Deus di jintius tambi? Sertu i delis tambi,

³⁰ suma Deus i un son, ku ta fasi judeu justu pabia di fe; i ta fasi tambi jintiu ku ten fe nel justu.

³¹ Nta no na pirdinti lei pabia di fe? Nunka, ma no na firmanta lei.