Romanus 2 - BIBLIA - traduson antigu in Krioulo

Kulpa di judeus

¹ Abo, omi, kualker ku bu sedu, si bu na julga, bu ka ten diskulpa. Na kil ku bu na julga utru, bu na kondena bu kabesa, pabia bu na fasi suma el.

² No sibi kuma Deus ten roson ora ki na julga kontra kilis ku ta fasi ki kusas.

³ Abo, omi ku na julga kilis ku ta fasi e kusas, bu kuda kuma, si bu na fasil, bu na kapli di justisa di Deus?

⁴ O bu ta njuti rikesa di si bondadi, kuma ki ta sufriu ku pasensa? Bu ka sibi kuma bondadi di Deus i pa lebau pa ripindimentu?

⁵ Manera ku bu korson i duru, i ntemus, bu na buri raiba riba di bo na dia ku Deus na mostra si raiba ku si justu juisu.

⁶ I na paga kada un pa kusa ki fasi.

⁷ I na da vida ku ka ta kaba pa kilis ku kontinua na fasi ben, e buska gloria ku rispitu, ku vida ku ka na dana,

⁸ ma kilis ku na fasi se propi vontadi, ku nega sigi bardadi, e misti son mal, e na risibi son raiba ku kastigu.

⁹ Sufrimentu ku dur na bin riba di tudu jinti ku na fasi mal, purmeru pa judeus, tambi ku jintius,

¹⁰ ma gloria ku rispitu ku pas na bin pa tudu kilis ku ta fasi ben, purmeru pa judeus, tambi ku jintius,

¹¹ pabia Deus ka ta fasi skuju.

¹² Tudu kilis ku peka sin lei di Deus, e na pirdi sin lei. Tudu kilis tambi ku sibi lei di Deus, e peka, lei na julga elis.

¹³ I ka son obi lei ku ta pui algin justu dianti di Deus, ma kilis ku ta fasi kil ku lei manda, elis ku ta ojadu justu.

¹⁴ Ora ku jintius ku ka tene lei di Deus na fasi na se vontadi kusas ku lei manda, nin ke ka tene lei, elis ku sedu lei pa se kabesa.

¹⁵ E mostra kuma kusa ku lei manda i sta skritu na se korson. Se sintidu tambi na mostra kuma es i bardadi, pabia utru ora se pensamentu ta akusa elis, utru ora i ta difindi elis.

¹⁶ Asin ki na sedu na dia ku Deus ku Siñor Jesus Kristu ten ku julga sigridu di jinti, suma Bon Noba, ku N ta konta, fala.

Sirkunsison di bardadi

¹⁷ Si abo, bu comadu judeu, bu na fiansa na lei, bu na njata na Deus,

¹⁸ bu nsinadu na lei tok bu kunsi vontadi di Deus, bu na seta tudu kusa bon,

¹⁹ bu fia kuma bu ta gia segus; abo i lus di kilis ku sta na sukuru,

²⁰ nsinadur di tulus, pursor di mininus; na lei bu ten forma di ntindimentu ku bardadi;

²¹ abo propi ku ta nsina utru jinti, bu ka na nsina bu kabesa? Abo ku fala pa ka furta, bu na furta?

²² Abo ku fala pa ka kai ku algin ku bu ka kasa ku el, bu na fasil? Abo ku nfastia iran, bu na furta na baloba?

²³ Abo ku ta njata na lei, bu na falta Deus rispitu manera ku bu na kebra lei?

²⁴ Asin, suma ki sta skritu: “Jintius na njuti nomi di Deus pabia di bos.”

²⁵ Si bu guarda lei, bu sirkunsison na bardadi i ten balur, ma si bu kebra lei, bu sirkunsison i suma nada.

²⁶ Nta si algin ku ka sirkunsidadu guarda mandamentus di lei, si dunu ka ta sta suma kil ku sirkunsidadu?

²⁷ Si algin ku ka sirkunsidadu na kurpu na fasi suma ku lei fala, i na bin julgau, abo ku sirkunsidadu, bu tene lei skritu, ma bu ta kebra lei.

²⁸ Judeu i ka son kilis ku parsil di fora, nin i ka kilis ku sirkunsidadu na kurpu,

²⁹ ma judeu i kilis ku sedu dentru delis, ku ten se korson purifikadu. I kusa di Spiritu, i ka di letra. Ki koldadi, i ka omi ku na ngaba elis, ma i Deus.