Romanus 16 - BIBLIA - traduson antigu in Krioulo

Manteñas

¹ N ntrega bos no irma Febe ku ta tarbaja na igreẑa di Senkreia,

² pa bo risibil na nomi di Siñor suma ku krentis dibi di risibi ŋutru. Bo judal ku tudu ki pirsisa di bos, pabia el i juda manga di jinti; ami tambi i un delis.

³ Bo fala Prisila ku Ákila manteña, ña kumpañeris na tarbaju di Kristu Jesus.

⁴ Elis e pui se kabesa na pirigu pabia di ña vida. I ka ami son ku fika elis obrigadu, ma tudu igreẑa di jintius.

⁵ Bo fala manteña tambi pa igreẑa ku ta junta na se kasa. Manteña tambi pa Epénetu, ña kiridu, purmeru ku seta Kristu na Asia.

⁶ Manteña pa Maria ku tarbaja ciu pa nos.

⁷ Manteña pa Andrónika ku Júnia, ña parentis ku seta Kristu antis di mi, ña kumpañeris di kalabus, kunsidu ben na metadi di apostolus.

⁸ Manteña pa Amplias ku N ama na Siñor.

⁹ Manteña pa Urbanu, no kumpañer na tarbaju di Kristu, ku ña kiridu Stákis.

¹⁰ Manteña pa Apilis, ku Kristu kontenti ku el. Manteña tambi pa jinti di kasa di Aristóbulu.

¹¹ Manteña pa Erodion, ña parenti. Manteña pa krentis di kasa di Narsisu.

¹² Manteña pa Trifena ku Trifosa ku ta tarbaja pa Siñor. Manteña pa ña kiridu Pérsida ku tarbaja ciu pa Siñor.

¹³ Manteña pa Rufu ku Siñor kuji pa el, ku si mame, ku sedu suma ña mame tambi.

¹⁴ Manteña pa Asínkritu, Flegonti, Ermas, Pátrobas Ermes, ku ermons ku sta ku elis.

¹⁵ Manteña pa Filólogu, Júlia, Nereu ku si irma, Olímpia, ku tudu krentis ku sta ku elis.

¹⁶ Bo fala ŋutru manteña ku beẑu santu. Tudu igreẑas di Kristu manda bos manteña.

Konsiju di kabantada

¹⁷ Ermons, N na roga bos pa bo toma sintidu ku kilis ku ta bai kontra nsinu ku bo dadu; e ta tisi divison na bo metadi, e ta pui utrus pa e kai na fe. Bo lunjusi delis,

¹⁸ pabia kilis ku ta fasi asin e ka na sirbi Kristu no Siñor, ma e na sirbi se propi vontadi. E ta ngana menti di jinti inosenti ku se boka sabi ku ngodu.

¹⁹ Tudu jinti sibi kuma bo ta obdisi. E ku manda N kontenti ku bos. N misti pa bo jiru pa kusa bon, pa bo sedu inosenti pa kusa ku ka bali.

²⁰ Deus, no fonti di pas, i ka na tarda pa kebra Satanas bas di bo pe. Fabur di no Siñor Jesus ta sta ku bos.

²¹ Timótiu, ña kumpañer na tarbaju, i manda bos manteña, ku Lusiu, ku Jason, ku Sosípatru, ña parentis.

²² Ami Térsiu, ku skirbi e karta pa Paulu, N manda bos manteña na nomi di Siñor.

²³ Ña gasijadur Gaiu, na kasa nunde ku igreẑa ta junta, i manda manteña pa bos. Erastu, tisoreru di prasa, ku no ermon Kuartu, tambi manda manteña. [

²⁴ Fabur di no Siñor Jesus Kristu ta sta ku bos tudu. Amen.]

Orason di ngaba Deus

²⁵ Gloria pa Deus ku ten puder pa firmanta bos, konformi Bon Noba di Jesus Kristu ku N ta prega, suma no mostradu ja sigridu ku sukundidu antis di mundu formadu.

²⁶ Gosi, pa ordi di Deus iternu, e sigridu sai na klaridadi, pabia di kartas ku anunsiaduris skirbi. I kontadu pa tudu nasons pa e pudi fia, e obdisi.

²⁷ E uniku Deus jiru, i mersi dadu gloria pa tudu sempri pa Jesus Kristu. Amen.